БЕОҐРАД/РУСКИ КЕРЕСТУР – Школяре першей класи Ґимназиї на руским язику рукококерестурскей Штреднєй школи „Петро Кузмяк” Терезка Будински и Марко Буила, з педаґоґиню Любицу Няради, 19. и 20. юния у Беоґрадзе участвовали на пририхтованю за програму RUR.IT.A.N.I.A, хтору у Волонтерским центре Сербиї орґанизовали Млади виглєдоваче Сербиї. Нашо школяре до тей програми нєдавно вибрани медзи 10 школярох зоз Сербиї.
Школяре-учашнїки розпоредзени до ґрупох, прейґ рижних роботньох достали потребни информациї за квалитетне участвованє у програми, як и таблети и плацени интернет за цо лєпшу медзисобне комуникованє и ученє.
Школяре достали и теми хтори ше будзе обрабяц на обукох у медзинародней черанки школярох. У Нємецкей, дзе на обуку идзе Будинскова, главна тема будзе орґанска заградка, а у Белґиї, дзе пойдзе Буила, креативни филмски роботнї.
RUR.IT.A.N.I.A то програма за злєпшованє медзинародней мобилносци и диґиталних схопносцох младих людзох з руралних штредкох з 10 европских жемох, а медзи нїма и зоз Сербиї.