МОКРИН/ИЛОК – Дзеци з Рукометней секциї Основней школи „Петро Кузмяк” участвовали на двох мини рукометних турнирох – у Мокрину и у Илоку у Републики Горватскей.
Внєдзелю, 23. децембра, отримани турнир у Мокрину, на котрим участвовали осем екипи, подзелєни до двох ґрупох. Керестурски рукометаше були у ґрупи зоз екипами зоз Сенти, Кикинди и домашнїма, а одбавели три змаганя. Процив екипи зоз Сенти страцели зоз резултатом 15:10, победзели Кикинду 15:5, и победзели домашнїх 14:9.
У орґанизациї Женского рукометного клубу „Илок”, 29. и 30. децембра бул отримани медзинародни Крачунски турнир у женским рукомету на котрим ше змагали штири екипи – зоз Надлацу з Румуниї, комбинована екипа зоз Дироню и Руского Керестура, екипа зоз Славонского Броду и домашнї з Илоку.
Комбинована керестурско-дироньска екипа завжала друге место, першого дня победзели Надлац зоз резултатом 13:9, а страцели од домашнєй екипи 14:12. Другого дня бавели перше змаганє зоз екипу Славонского Броду и победзели 14:9, у финалу страцели од домашнїх 15:14, а змаганє було напарте по сам конєц дзе ниянси и щесце одредзели побиднїка. З Керестура ше окреме визначели Кияра Будински и Єлена Фейди. По законченю змаганьох, шицким учашнїком додзелєни припознаня и погари.
Першого дня у ревиялней часци турнира ше змагали и младши бавячки зоз Руского Керестура зоз домашнїма котрих победзели з резултатом 18:9, цо було єдно квалитетне змаганє з котрого могло заключиц же убудуце будзе формована екипа з котру вредзи робиц.
Попри змаганьох, орґанизаторе госцох крашнє привитали и туристично их упознали зоз варошом. На туристичним гайзибанчку Илоцкей винариї обишли город, Городски музей и Стару илоцку винарию.
