Керестурцом два перши места

автор мар
1k Опатрене

НОВИ САД – На Медзиокружним школским атлетским першенстве котре отримане штварток, 10. мая у Новим Садзе, участвовал Филип Будински, школяр шестей класи Основней школи „Петро Кузмяк” у дисциплини руцаня кулї.

Право участвованя здобул дзекуюци завжатому першому месту на Окружним змаганю у Зомборе. Будински на тот завод лєм потвердзел свойо атлетичарски схопносци, понеже и тераз освоєл перше место.

Дзекуюци тому успиху, млади рускокерестурски атлетичар будзе участвовац и на Републичним змаганю котре будзе отримане у Новим Пазару 15. мая, а на змаганьох го провадзи професорка физичного воспитаня у школи „Петро Кузмяк” и тренер Атлетского клубу „Русин”, Саня Тиркайла.

На истим змаганю, участвовал и Керестурец Дарян Белак, котри представял штредню Транспортну школу „Пинки” з Нового Саду. Белак ше змагал у дисциплини бежаня на 1 000 метери, дзе заважал перше место, та ше и вон будзе змагац на Републичним уровню у Новим Пазару.

Дарян Белак на побиднїцким месце (у штредку)

ПОВЯЗАНИ ТЕКСТИ