РУСКИ КЕРЕСТУР – Ювилейни 50. Драмски мемориял Петра Ризнича Дядї будзе отримани од 16. по 25. марец 2018. року – утвердзене вчера на першей схадзки Орґанизацийного одбору Мемориялу.
Гоч була планована у преширеним составе, схадзка Орґанизацийного одбору ювилейного Драмского мемориялу у Доме култури отримана як консултативна розгварка, понеже пре рижни причини нє пришли велї поволани представителє наших установох, КУД-ох и медийох, гоч поволанки послани на коло 30 адреси.
На тей прелиминарней схадзки, зоз хтору предшедовал предсидатель Орґанизацийного одбору Йоаким Рац, и на хторей були присутни углавним члени Одбору, винєшени начални идеї о концепциї ювилейного Мемориялу, и можлївих пейц до осем за старших и пейц дзецински представи.
Предложене же би на ювилейни Мемориял були поволани и професийни Театер „Александар Духнович” з Прешова у Словацкей и Сербски народни театер з Нового Саду.
У планє и провадзаци змисти ювилейного Мемориялу як цо мултимедияла видео-програма, пригодна публикация и илустративна вистава технїчних и провадзацих елементох у театру, як и подзекованя заслужним поєдинцом и колективом.
Констатоване же змисти 50. Драмского мемориялу буду завишиц и од финансийох, а попри уж окончених прелиминарних розгваркох у општини, орґанизатор планує и службени нащиви до Покраїни и Републики, вєдно з представителями наших националних институцийох, з вимогу за пригодну, дакус векшу финансийну потримовку тей значней смотри нашей драмскей творчосци.
Як вчера порадзене, шлїдуюца схадзка Орґанизацийного одбору, знова у преширеним составе, будзе отримана найпознєйше о мешац.
