Концерт ШОМО за конєц школского року

автор маф
861 Опатрене

РУСКИ КЕРЕСТУР – У Велькей сали Дому култури Руски Керестур вчера вечар отримани Концерт школярох керестурского оддзелєня Школи за основне музичне образованє (ШОМО) з Кули, а з нагоди законченя школского року. Представени и найуспишнєйши школяре.

Директорка ШОМО Лїляна Барна Никитович на початку визначела же тот школски рок бул успишни и по числу наградох на змаганьох, а тому вельо допринєсли и штирме керестурски школяре хтори шицки освоєли перши награди.

То тамбураше у класи Геленки Гарвильчак – Иґор Папуґа, V класа тамбура бас прим, школяре VI класи, Матей Катрина тамбура бас прим и Виктор Хрин тамбура прим, як и клавириста у класи наставнїка Мирона Сивча Михайло Рацпети хтори освоєл аж два перши награди. Визначел ше и Леонтий Сивч хтори през школованє тиж посцигнул красни успихи.

Директорка визначела же од 26 школярох закончуюцих класох шесцеро ше змагали прешлого року, а штверо предлужую музичне школованє, медзи нїма и Керестурци Хрин и Рацпети.

Шицки спомнути керестурски школяре наступали 4. юния у Кули на окремним Концерту найуспишнєйших школярох ШОМО дзе достали и припознаня и награди од школи, и дзе преглашена и школярка ґенерациї Милица Радошевич.

На концерту у Керестуре, у 26 точкох ше потим представели школяре керестурского оддзелєня, а вельочислена публика окреме уживала у наступох спомнутих школярох и камерних составох.

ПОВЯЗАНИ ТЕКСТИ