РУСКИ КЕРЕСТУР – Тогорочна Двацец штварта Културна манифестация „Костельникова єшень” (КЄ) будзе отримана од 10. по 18. новембер у вецей наших местох, утвердзене вчера, 18. октобра, на схадзки Орґанизацийного одбору Манифестациї. Схадзка отримана у просторийох орґанизатора КЄ – рускокерестурского Дому култури.
Предвидзена дотерашня концепция, з акцентом на промоциї нових кнїжкох на руским язику и стретнуца з писателями, як и музично-литературни вечари.
Програми КЄ буду отримани у школох – 10. новембра у Руским Керестуре и 16. новембра у Коцуре, дзе буду представени нови кнїжки Михала Ковача, Милутина Дюричковича, Себастияна Нярадия и Сашу Сабадоша.
Литературни вечари за старших почню з централним 10. новембра у Керестуре, на хторим буду презентовани найновши твори академика Юлияна Тамаша, Сашу Сабадоша, Олени Планчак Сакач, Миколу Мушинки, Гавриїла Костельника и Мирослава Алексича.
У Коцуре литературно-музични вечар „На чесц Костельникови” 11. новембра орґанизує Етно-клуб „Одняте од забуца”, хтори пририхта и виставу з нагоди 10-рочнїци своєй роботи, а представянє творчосци академика Юлияна Тамаша 12. новембра будзе у Дюрдьове.
Стретнуце з писателями и подобовима уметнїками Серафину и Силвестером Макайовима у Коцуре будзе 16. новембра, а традицийне Стретнуце рецитаторох 18. новембра у Кули.
„Костельникова єшень” будзе закончена з Мултимедиялну програму младих „Дньовка” у Руским Керестуре, хтора будзе отримана 18., а можлїве же и дзень скорей, 17. новембра, гварене на вчерайшей схадзки.
Зоз схадзку предшедовал предсидатель Орґанизацийного одбору КЄ Микола Шанта, а тогорочна Културна манифестация будзе отримана у знаку 80-рочнїци народзеня нашого композитора Ивана Ковача.