Крачунска винчованка кир Георгия Джуджара: Христос раждаєтся!

автор кир георгий джуджар
1k Опатрене

Вертепе привитай, бо Правда пришла,

цинь прешла и Бог од Дїви ше зявел людзом,

приял нашу подобу и обожествел цело.

Прето ше Адам зоз Еву обнавяю, шпиваюци:

змилованє Боже ше зявело на жеми, же би спашиц род наш.

 (Тропар, І Час,

Вилїя Рождества Христового)

 Нєшка торжествує цала Церква, дочекуюци и преславююци Рождество Христово и у тей подїї ше чудує премудросци, любови и благоволению Бога до цалого людского роду. Радую ше ангели на нєбе и людзе на жеми, радує ше шицко створенє пре народзеного у Вифлеєме Спасителя Господа.

Святи апостол, євангелист и богослов Йоан пише же ше любов Божа до нас указала у тим, же Бог Сина свойого єдинородного послал на швет, же бизме прейґ Нього мали живот вични (І Йо. 4,9).

Господь Бог видзел же людзе гиню у грихох и жадаюци спашиц людски род, прихилює нєбо и сходзи на жем, отїлотворює ше од Духа Святого и Мариї Дїви, прима людску природу, обнавя ю и враца людзом страцене синовство Боже и вязу з Богом.

У крачунскей ноци ангел сповисцел цалому швету вельку радосц: „Нєшка ше вам у Давидовим городу народзел Спаситель, котри Христос Господь” (Лк. 2,11). Вон нєприступне шветло и блїск Оца, приял на себе людску природу, постал доступни людзом и приведол их до живоносного шветла.

Благодатне злученє зоз Христом обнавя богоподобносц людзох, яки одпадли од божественого живота; обнавя полноту людского живота до першобутного стану щесцa и радосци.

Швето Рождества Христового – то священи и божествени дзень. Же бизме го достойно дочекали треба ше пририхтац з очисценим шерцом прияц Христа, же би ше дух божественей любови дотхнул до нашого шерца и препородзел го до живота полного ласки.

Рождество Христово – народзенє Бога у людским целу ше одноши на сенс нашого живота: Бог створел чловека зоз безсмертну душу! Вичне иснованє души нє завиши од вибору и од волї каждого з нас. Людски живот почина ту на жеми, а предлужує ше и тирва у вичносци безконєчно. Яка будзе вичносц визначує кажди сам за себе, примаюци або одруцуюци Бога.

Бог приходзи на жем, Вон нєшка приходзи до живота каждого з нас. А ми, чи ми го сцеме прияц, дошлєбодзиц му пременїц наш живот? Чи, як жителє Вифлеєму, виганяме го зоз наших шерцох, зоз наших биваньох?

З превелькей и за нас нєпохоплївей любови Бог жадал злучиц ше зоз людску природу у другей Особи Божей: Син Божи постава чловек и нє престава буц Бог. Тоту правду ми визнаваме у молитви Вирую: „Верим … до Сина Божого, котри пре нас и пре нашо спашенє зишол з нєба, и отїлотворел ше од Духа Святого и Мариї Дїви, и постал чловек”. Пре нашо спашенє, нам подаровац полноту живота и отвориц радосц; зробиц чловека щешлївим, Бог приходзи до нашого швета, до живота каждого окреме.

Тоту подїю народзеня Сина Божого – Рождество Христово ми нєшка славиме. Син Божи ше народзує прето же би ошлєбодзел чловека зоз рабства, же би победзел у людскей природи грих и шмерц.

Най у наших шерцох ше найду тоти скромни яшелька, котри порихтани прияц новонародзеного Христа, и тоти драгоцини дари, котри принєшеме Йому – то вира и дзецинске довириє до Бога; то мир, жиченє добра шицким и каждому, жертвене служенє ближньому и любов, котра облапя шицких.

Подзекуйме Господу за шицки Його ласки и дари, даровани нам у прешлим року и модлїме Його милосци на будуци рок.

У тим шветочним чаше винчуєм шицким Рождество Христово и Нови рок! Мир Божи най наполнї и ошвици нашо шерца.

Тиж вичуєм шицким членом нашей Церкви подзвигнуце нашого Апостолского Еґзархату на Епархию Святого Миколая. Най подзвигнуце Еґзархату на Епархию будзе на славу Божу, а нам на роснуце у духовим живоце, на укрипенє у вири и на спашенє!

            Христос раждаєтся! Славите Єго!

            Ваш Владика

            + Георгий

ПОВЯЗАНИ ТЕКСТИ