БЕОҐРАД – Союз културно-уметнїцких дружтвох Сербиї з потримовку Министерства култури и информованя, нєшка на 13 годзин орґанизує акцию „Моц аматеризма”.
Културно-уметнїцки дружтва (КУД) у вецей як 150 городох и местох ширцом Сербиї орґанизую єдногодзинову акцию у котрей ше прешейтаю и виведу даєдни зоз своїх танцох же би ше на тот дзень Сербия здогадла на вельку моц аматеризма, наявел министер култури и информованя Влада Вукосавлєвич.
Вукосавлєвич додал же нєобходне же би держава з конкретнима финансийнима и орґанизацийнима мирами помогла културно-уметнїцким дружтвом же би ожили и отримали ше.
Министер защити животного стредку Ґоран Триван, котри и предсидатель Скупштини союзу културно-уметнїцких дружтвох Сербиї, гварел же нєдопущуюце гашенє вецей дзешаткох КУД-ох ширцом Сербиї пре нєвигодну материялну ситуацию и поволал локални самоуправи же би помогли своїм културно-уметнїцким дружтвом.
Акция будзе отримана у вецей городох Войводини: Новим Садзе, Вершцу, Кикинди, Зренянину, Бечею…
(Фотоґрафия зоз концерту Дома култури Руски Керестур отриманим у маю того року).