НОВИ САД – У „Студию М” Радио телевизиї Войводини (РТВ), вчера, 4. марца, отримани 28. Фестивал рускей народней шпиванки „Ружова заградка”. На нїм виведзени 16 нови композициї у народним духу.
Члени фахового жирия у составе Лїляна Барна Никитович, Олена Пушкаш, Олена Планчак Сакач и Снежана Янюшевич, як и публика у сали Студия, оценьовали и одлучовали котри авторе композицийох, текстописателє, аранжере и интерпретаторе буду наградзени.
За найлєпшу композицию фахови жири преглашел „Любов нас вола” композитора Мирона Сивча, хтори заслужни и за аранжман у истей шпиванки, на текст Агнети Тимко Мудри, а одшпивал ю Алексей Сивч.
Другу награду достала шпиванка „Пошол ши” композитора Любомира Загорянския за хтору написал и текст, а за аранжман заслужни Зоран Мулич. Шпиванку виведла Танита Ходак.
Треца награда на тогорочним Фестивалу додзелєна композициї „Мила моя” за хтору музику, текст и аранжман написал Йован М. Йованович, а одшпивал ю Йовґен Надь.
По думаню публики у сали „Студия М” найлєпша шпиванка була „Лєм пре тебе” Михайла Будинския, хтори вєдно зоз супругу Татяну Дротар Будински написали текст, а Михайло ю и одшпивал.
Награду за найлєпши текст достала Агнета Тимко Мудри, у шпиванки „Любов нас вола”, а у истей композициї награда за найуспишнєйши аранжман пошла до рукох Мирона Сивча.
Фахови жири за найлєпшу интерпретацию наградзел Ану Римар, хтора шпивала шпиванку „Стретнуце”, на текст Душанки Костич, а музику компоновала Даниєла Горняк. Автор аранжмана Боґдан Ранкович.
Попри спомнутих, на тогорочней „Ружовей заградки” виведзени композициї Славка Афича, Ондрея Маґловского, Дьордя Планянина, Драґани Ґлувня Бабич, Татяни Колєсар Ґвоїч, Петра Попи, Михала Лїкара, Драґана Новаковича, Бранислава Тубича, Славка Бесерминя и Йовґена Надя. Шпивали их и Кристина Афич, Иван Славик, Александра Колбас, Тамара Ґрозданич, Уна Молнар, Ивана Чордаш, Тамара Салаґ, Катарина Кочиш, Борис Маґоч, Саня Дивлякович и Мирослава Даждиу.
Ревиялна часц тогорочного Фестивала була пошвецена Михайлови Зазуялкови котри як автор числених композицийох бул стаємни и длугорочни сотруднїк „Ружовей заградки”.
Шпивачох провадзела Студийска вокална ґрупа и Вельки народни оркестер Радио телевизиї Войводини под руководством Мичи Янковича.
Тогорочни 28. Фестивал „Ружова заградка” отворел заменїк ґенералного директора Явней медийскей установи РТВ Йожеф Клем, продуцент Фестивалского вечара бул Зоран Дракула, а о добрим звуку и тонским запису старал ше Едвин Балош. Музични редакторки Фестивала Агнета Тимко Мудри и Татяна Колєсар Ґвоїч.
Конферансу на „Заградки” водзели Александра Лендєр и Андрей Орос, а попри численей публики з наших местох и госцох з иножемства, Горватскей и Словацкей, програму на Фестивалу провадзели и чолнїки Националного совиту Руснацох, наших установох, институцийох и здруженьох.
Орґанизатор Фестивала – Явна медийска установа Радио Телевизия Войводини, так же Фестивал и того року директно преношени прейґ ТВ, радио габох и интернету. Отримованє „Заградки” помогли и нашо институциї и привреднїки з велїх местох дзе жию Руснаци.
