Лєгко правиц „лєтню шему” у новинох „Руске слово”, кед єст за тото досц боки. Од априла того року новини „Руске слово” виходза на 40 бокох и блїзко су тому же бизме их могли наволац „тижньовнїк”, або аж и „часопис”. За таке дацо би голєм 52 боки, як, поведзме, цо у случаю „Глас люду”. Алє ту о иншим слово.
Од того числа, та по септембер, наша новина преходзи на змисти прилагодзенши ґу лєту. Будзе ту стари рубрики, котри знаце з прешлих рокох, як „Интермецо” на 2. боку (место колумни „Анатомия нашого часу”), алє буду ту и нови рубрики у каждим чишлє, як рецепти и гумор „Хладок и горуци тепши” на 38–39. боку, як и фельтон у предлуженьох о рускей сучасней култури „Як (нє) скапал рокенрол”.
До „Руского слова” ше так, од прешлого року фактично, враца нє прости и цикави новинарски жанр – фельтон.
Тото цо премиєрно будзе представене того лєта голєм два раз (у юлию и авґусту) – бок за дзеци, односно „Заградка у Руским”. Иснує план же би и после лєтнєй шеми тота рубрика постала єдна од стаємних у новинох „Руске слово”, же би ше наймладши читаче могли информовац и забавяц док чекаю праву „Заградку”.
Вшелїяк, у лєтнєй шеми предлужуєме зоз рубриками котри прилагодзени ґу младим и рубриками розважного типу, як цо то „Мозаїк”, як и „Медзипростор за кафу и виключеня” (гумор за младших) и „Дикица” (гумор за старших).
Насловни боки тиж буду прилагодзени ґу лєту и його красотом, як и ґу младшим ґенерацийом.
Вшелїк, нє треба думац же у тим периодзе будзе застановене информованє по руски. Шицки стаємни рубрики буду виходзиц порядно, озноєне будне око рускословских новинарох будзе провадзиц подїї у заєднїци и реґиону. Заплановани цикави розгварки.
Од септембра чека нас викасованє рукавох – вецей боки за рубрики „Економия” и „Култура и просвита”. Потамаль – уживайце у цеплих дньох.
Пишце нам – ruske.redaktor@gmail.com.