РУСКИ КЕРЕСТУР – Седму манифестацию „Днї керестурскей паприґи” спред орґанизатора Здруженя паприґарох „Капискум анум” отворел Владимир Варґа, а спред локалней самоуправи, предсидатель Општини Кула Велибор Милоїчич.
– Перше бим сцел подзековац Општини Кула, Месней заєднїци Руски Керестур, Покраїнскому секретарияту, шицким спонзором и людзом добрей дзеки котри нам помагаю у орґанизациї, бо то наисце велька робота, а мило ми же нас каждого року єст вше вецей и же то вше нащивенше – гварел Варґа.
Милоїчич привитал Керестурцох и шицких госцох манифестациї з першим виреченьом по руски, дзекуюци чому достал красни аплауз на початку його бешеди.
– Почитовани приятелє, добри дзень. Вельке ми задовольство же нєшка у мено Општини Кула можем отвориц седму манифестацию „Днї керестурскей паприґи”. Роками през сотруднїцтво зоз Здруженьом паприґарох потримуєме манифестацию котра препозната, як у привредним и туристичним значеню, так и у животним значеню за жительох Руского Керестура, понеже по паприґи Керестур препознатлїви. У складзе зоз тим, тогорочна манифестация реализована у рамикох прейґгранїчного ИПА проєкту, котри вєдно реализую Општина Кула и Општина Калоча зоз Мадярскей. Подзековал бим домашнїм на орґанизациї, тиму зоз Канцелариї за локални економски розвой Општини Кула котра роби на реализациї того проєкту, а здогаднєм вас же ше тот исти проєкт предлужи идуцого тижня у Кули, а будзе тирвац до идуцого року кед будзе и закончуюца конференция – гварел предсидатель Општини Кула.
Вецей фотоґрафиї мож поопатрац у нашей фотоґалериї.