Приповедки о историї, култури, обичайох, вири и способу живота Руснацох, охабяю упечаток на людзох котри ше становя у Руским Керестуре, лєбо даєдним зоз местох дзе жию Руснаци. Медзитим, гоч маю специфичносци и потенцияли за розвой валалского туризма, нашо места ище вше нєвидлїви на туристичней мапи Сербиї.
Понеже нє ма виход на морє, у своїм туристичним понуканю Сербия кладзе акцент на валалски и манифестацийни туризем, цо и дефиноване у Стратеґиї розвою туризма за период од 2016. по 2025. рок. Кед слово о Войводини, ту як главни атракциї препознати природа, ґастрономия, лов и риболов, манифестациї и други случованя. Попри тим, наша Покраїна ше може похвалїц и зоз културу, релиґию, обичаями, архитектуру, творчосцу, а шицко тото зоз префиксом „мулти”.
Анализи хтори окончени за потреби спомнутей Стратеґиї указали же помали рошнє число людзох котри свойо дакедишнї лєтнї одпочивки на морю зачерали за пребуванє на валалє, на даєдним зоз 30 салашох у Войводини, етно валалох, и популарних Етнопаркох.
ТУРИЗЕМ ТО ЛЄМ АТРАКЦИЇ
– Кажде место хторе задоволює туристични потреби и вимаганя туристох, може постац туристична дестинация. Єй гранїци одредзує тарґовище, односно сами туристи и їх перцепция, та туристична дестинация може буц цала держава аж и континент, реґион, острово, город, метропола, валал, купель, гора, озеро, аж и готел лєбо ладя – гвари мастер менаджер у обласци туризма Весна Киш зоз Дюрдьова.
Нажаль, на специялизованих сайтох о туризме чежко мож найсц атракциї хтори вязани за Руснацох.
– Руски Керестур як туристична дестинация ма потенцияли, перше прето же зме окремни як национална заєднїца, маме окремну ґастрономию хтору треба промововац. Потим маме паприґу як керестурски бренд и на основи того би могло розвиц и аґротуризем, же би госци мали нагоду коштовац домашнї єдла хтори порихтани з домашнїх продуктох. Потим би могли сами оберац домашню овоц и желєняву, класц до дунцох, вариц маджуну, печиц паприґу… Людзом интересантни ище и конїкаре, спортски риболов и вирски туризем у рамикох хторого обиходза Катедралу святого оца Миколая и Святилїще Водицу – гвари предсидателька Туристичного здруженя Руски Керестур Любица Няради.
Туристична орґанизация општини Вербас як атракциї Коцура, та и општини представя Етно хижу „Одняте од забуца”, дзе ше находзи збирка од коло 2 500 експонатох хтори одражую живот и творчосц Руснацох и других народох у Коцуре и других местох на териториї општини Вербас, потим церкви, як и велї културни манифестациї хтори ше отримує у тей општини.
Места у Сриме понукаю манифестациї хтори промовую ґастрономию, познати сримски винариї, а ґу тому єст можлївосци и за розвой вирского туризма.
Бешедуюци о стану у жабельскей општини, Весна Киш визначує же Дюрдьов и други места у општини маю нєвихасновани ресурси, як цо то 60 салаши у околїску Жаблю.
– Проблем же вони оддалєни од асфалтней драги и же жительство тей општини нє заинтересоване за розвой туризма, нє розумя яки прави хасен з нього, насампредз на особним и локалним уровню. Затераз, у општини реґистровани лєм єден погосцительни обєкт, Етно хижа „Бабов салаш”. Заш лєм, ситуация солидна. У Жаблю ше находза ґолф терени и дзекуюци турниром ґолфу, промовує ше и други туристични понукнуца того места и општини.
МАНИФЕСТАЦИЇ ПРИЦАГУЮ НАЙВЕЦЕЙ ГОСЦОХ
– Єден з найефикаснєйших способох за прицагованє туристох то манифестацийни туризем, а општина Жабель ше може похвалїц зоз вельким числом манифестацийох: „Нови вина Потися”, „Жабельски днї”, „Златни котлїк Жаблю”, „Шкембияда”, „FrogvilleFest” – гвари Весна Киш.
Як дознаваме од предсидателя здруженя КУМ у Коцуре Стевана Самочети, тот наш валал ма найвецей госцох под час културней манифестациї „Коцурска жатва”, хтора каждого року позбера Руснацох зоз шицких наших местох, як и других заинтересованих за културу нашого народу. Ґу тому, же би ше за Коцур и Руснацох чуло и южнєйше, поряднє ше орґанизує и змисти як цо Стретнуца младих, волонтерски кампи на хтори приходза млади зоз целей держави.
Як и други места, так и Руски Керестур найвецей нащивительох ма влєце кед ше отримую значни случованя, насампредз Фестивал рускей култури „Червена ружа” и Манифестация „Днї керестурскей паприґи” хтора и того року прицагла вельке число привреднїкох и других нащивительох. Вшелїяк же тот аспект барз важни и оможлївює же би ше за Руски Керестур дознало и у контексту привреди.
Кампи хтори ше отримую през лєто прицагую и младих, а значне число Руснацох зоз дияспори ше тиж опредзелює препровадзиц часц лєтнього одпочивку у своїм валалє.
Медзитим, же би туризем зажил, попри атракцийох треба ше остарац и за основну инфраструктуру, комунални услуги, доступносц явного транспорту и повязаносц драгох. Тото цо наисце важне и о чим би штудирац то як обезпечиц же би туристична дестинация мала погосцительни обєкти и места за пребуванє, односно ноцованє.
ПРОБЛЕМ КАТЕҐОРИЗАЦИЇ ОБЄКТОХ ЗА ЗМЕСЦЕНЄ
Кед би, наприклад, дахто сцел препровадзиц одпочивок у Руским Керестуре, и на сайту за глєданє змесценя удуркал – Руски Керестур, увидзи же до найблїзшого реґистрованого обєкту за змесценє треба путовац до Кули, односно коло 10 километери од валалу. Гоч у валалє затераз єст штири обисца хтори видаваю хижи, вони нє прешли през процедуру катеґоризациї, та су прето нєлеґални и нєвидлїви на ширшим тарґовищу. Як гвари Любица Няради, тераз ше чека же би Општина формовала Kомисию за катеґоризацию хтора виходзи на терен, розпатра стан и констатує чи обєкт сполнює критериюми за катеґоризацию. Формованє комисиї лєм перши крочай у цалей процедури катеґоризациї, а покля ше нє формує, до ноцнїка у Руским Керестуре мож дойсц углавним прейґ контактованя познатих.
– Док нє маме капацитети за змесценє голєм 50 людзох, нє можеме нїч кончиц зоз туристичнима аґенциями и правиц тури до Керестура.
У валалє єст вше вецей заинтересованих за видаванє хижох и можем повесц же сом о тим уж бешедовала з даскелїма у валалє, та плануєм пошвидко отримац схадзку дзе увидзиме хто шицко жада участвовац у правеню капацитетох за змесценє. Кед нас будзе вецей, будземе баржей прицискац Општину же би порушала процес катеґоризациї. У валалє єст громаду празни хижи, а то таки потенциял же треба уложиц лєм дакус креативносци и ушориц их. То би могол буц красни простор за змесценє – дацо може буц оправене у етно-стилу, дацо у сучасним, и так би було по смаку и старшим и младим – гвари Нярадийова.
Окрем проблему зоз ноцнїком, потераз ше зауважовало же нє мож гоч кеди пойсц опатриц музейну збирку у Замку, алє ше пред тим муши наявиц, найчастейше до шедзиска Националного совиту, лєбо до Туристичного здруженя, же би дахто пришол одомкнуц. Ґу тому, нєт особи котра свойофайтови туристични водзач котри задлужени за туристичне обиходзенє валалу, алє як гвари Нярадийова, нєт можлївосци за анґажованє окремней особи хтора би то мала робиц.
Єдна з будуцих актракцийох у Руским Керестуре будзе и найстарша руска хижа у валалє, хтора тераз у власнїцтве Националного совиту Руснацох и реновира ше ю. Хижа будзе ушорена у стилу старей рускей хижи, а коло нєй плановане посадзиц древка, квеце и положиц лавочки же би там могло и кус одпочинуц, гвари Любица Няради. Як здогадла, подобне поробене и у Новим Орахове, дзе справена, односно ушорена етно хижа – полу руска, полу мадярска и коло нєй ушорени простор за дочек госцох, на цо ше Керестурци буду упатрац.
ПОТРЕБНА ДОБРА РЕКЛАМА
Єдинствени характер дестинациї и єй имидж на тарґовищу пресудни у прицагованю уваги потенциялних туристох. Же би ше то посцигло, насампредз важна реклама – добри и моцни маркетинґ, брендиранє, медиї и присутносц на интернету. Туристи жадаю же би им информациї о дестинацийох були лєгко доступни прейґ мобилних телефонох, таблетох и комютерох, и же би у каждей хвильки могли вибрац свою шлїдуюцу дестинацию. Прето интернет маркетинґ єден зоз найефикаснєйших, алє и найтуньших способох за прицагованє туристох, твердза фаховци зоз обласци маркетинґа.
ПРИКЛАД ДОБРЕЙ ПРАКСИ
– Валал Бело блато, хтори ше находзи у Банату, ма коло 1 500 жительох мадярскей, болгарскей, словацкей и сербскей нацоналносци. Интересантни є по тим же маю громаду туристох, понеже маю капацитети за змесценє двох, лєбо и трох автобусох полних з туристами. Вони маю три етно-хижи и прицагую туристох зоз матичних державох, а думам же и ми по националней основи можеме буц барз интересантни, та треба же бизме ше повязали зоз старим крайом и прицагли туристох отамадз – гвари предсидателька Туристичного здруженя РК Любица Няради.
