Предсидателька фондациї ”Suva Nawa” з Голандиї Bouwine Schuttel нєдавно нащивела Общи шпиталь Вербас пре догварку о будуцим сотруднїцтве з цильом розменьованя знаня и искуства медицинских шестрох и технїчарох у роботи зоз старшима и чежше рухомима/нєрухомима пациєнтами.
Oрґанизациї ”Сува Нава” основни циль роботи зменшанє ранївосци популациї старших, а з орґанизацию подполно управяю волонтере хтори руководза зоз ширшу мрежу, тиж волонтерох зоз Голандиї.
Тих дньох до вербаского Общого шпиталю сцигла донация скоро 100 плахитки и облєчени 200 заглавки.
Тота донация витворена у сотруднїцтве зоз священїком Евангелскей церкви з Коцура Александром Суботином, з Нєвладову орґанизацию ”За помоц восточней Европи” и фондацию ”Сува Нава”.
Окрем того, у збераню средствох за реализацию донациї участвовали и заняти у шпиталю ”Меандер” у Amersfoorty, Голандия, хтору нащивели два медицинси шестри зоз вербаского Шпиталю.
УПОЗНАЛИ ШЕ З РОБОТУ У ШПИТАЛЮ
Главна медицинска шестра Оддзелєня ортопедиї зоз трауматолоґию, пластичней и реконструктивней гирурґиї Душка Обровачки и терапеутска медицинска шестра Оддзелєня за ендокринолоґию и нефролоґию у Служби интерней медицини Валентина Николич под час авґусту нащивели шпиталь ”Меандер” у Амерсфорту, а нащива задумана як едукативно-роботна.
Вони окрем порядного роботного часу у шпиталю, дзекуюци панї Лени Хиленґа директорки двох старецких домох, нащивели вецей ґеронтолоґийни центри и други установи цо сотрудзую зоз шпитальом и фондацию ”Сува Нава”.
Иншак, фондация свойо приходи витворює през донаторски кампанї, спонзорства, зберанє средствох. Волонтере доставаю лєм строго лимитовани средства хтори закриваю стварни трошки под час активносцох.
ВЕЛЇ ПРОЦЕДУРИ ОЛЄГЧАНИ
Як визначела Душка Обровачки, попри колеґох и колеґиньох, особнє их дочекала и менаджерка Карина Кастелийн.
– Вона нам погуторела о роботним чаше шпиталю, упознала нас з роботу оддзелєньох на хторих будземе пребувац док зме у нащиви, а после упознаваня з колеґинями и колеґами почали зме провадзиц фахову роботу и упознавац ше з їх процедурами. Активно зме ше старали о полурухомих и нєрухомих пациєнтох. Тиж так, зме мали и обуку за роботу на машинох за дзвиганє и транспорт пациєнтох по тоалет. Окреме бим видвоєла же у каждей шпитальскей хижи єст електронски посцелї з алармну систему, так же кед пациєнт станє, а нє порихтани є, алармна система обвисци медицинску шестру – визначела Обровачки.
Валентина Николич додала же окреме интересантне у якей мири злєкшане дзелєнє терапиї. Медицински шестри маю и таблет, або даяку файту рухомого рахункару хтори ше находзи на кочику за дзелєнє ”пер ос” терапиї.
– Так, источашнє док окончую дзелєнє лїкох пациєнтом, зазначую кажди лїк и процедуру за каждого пациєнта поєдинєчно. Лїкаре и шестри нє ходза до визити вєдно, алє ше у одредзеним чаше сходза и коментарую стан пациєнтох, одредзую дальшу терапию и додатну дияґностику – гварела Николичова.
Колеґове у Голандиї им оможлївели видзив и Урґентни приєм у шпиталю, дзе ше после указаней першей помоци кончи примопредаванє информацийох медзи шестрами, и вец ше пациєнта такой враца на оддзелєнє на хторим и бул. Шестром з Вербасу було интересантне и же у шпиталю ”Меандер” иснує и Тим за консултациї.
– Сцели бизме искуство зоз шпиталю ”Меандер” применьовац у пракси у нашим Шпиталю тельо кельо то мож присподобиц ґу нашим ресурсом. А насампредз бим подзековац священїкови Александрови Суботинови хтори направел контакти медзи нашим и шпитальом у Голандиї, як и зоз фондацию ”Сува Нава”. Нащива задумана як врацаюца, та у шлїдуюцим крочаю очекуєме два колеґинї медицински шестри зоз Голандиї же нащивя Общи шпиталь Вербас – додала Обровачкова.
