РУСКИ КЕРЕСТУР – Вчера, 26. марца, у Руским Керестуре закончени тогорочни 49. Драмски мемориял Петра Ризнича Дядї, и то з одличну представу Театру „Стеван Сремац” з Червинки, чий ансамбл ше упущел до толкованя чежшого тексту Бертолда Брехта „Малогражданска свадзба”, нєшка уж татралного класика, познатого по своїх анархистично-социялистичних идейох и оштрого критичара дружтвених збуваньох.
„Малогражданска свадзба” написана ище 1919. року, алє по своєй критики малогражданского живота и справованя, живота по уходзених коляйох и правилох, дзе ше баржей водзи цудзу як свою бриґу, вишмеює креативносц своїх, а воздвигує цудзих, дзе шє превершує у шицким, а кед ше знєє маски – малогражданство указує свойо праве лїцо – до екстремносцоху своїм справованю, актуална є за шицки часи.
Под сиґурну професийну режисерку руку познатого ґлумца Сербского народного театру з Нового Саду Радоя Чупича (котрому то 14. режия), єденацчелнови старши и младши червински ансамбл довирлїво пренєсол поруку писателя, а ище баржей режисера, котри горе спомнуту дружтвену критику надбудовал з поруку же заколяєни, устаємнєни живот и норми справованя приводза до револуцийних пременкох, хтори нє вше и на лєпше, бо представу закончел з опомнуцом – нагадованьом тоталитаристичного (фашистичного) режиму.
Попри шветлосних, мизансценских и музичних ефектох, барз удатни були и хореоґрафски точки у представи, хтори подписує Єлена Салонтаї, а у досц виєдначеним ґлумецким ансамблу ше дакус видвиюю уж доказани червински ґлумци Цвиєта Йованович Мучалица („Млода”), Зоран Радулович („Млоди”), як и Биляна Бєлан („Мац млодей”), та Душан Николич („Приятель”).
Гоч на тогорочним Мемориялє було менєй представи як узвичаєне, упечаток же векшина були на добрим квалитативним уровню, нє лєм за старших, алє и дзецински.
(Вецей фотоґрафиї з представи на правим боку нашого сайту).
