Меншински медиї як медиї цивилного сектору?

автор Александра ЖИВКОВИЧ БУЧКО
1.3k Опатрене

Источашнє зоз бешеду о приватизациї медийох, хтора окончена 2015. року, почало ше бешедовац о перспективи медийох цивилного сектору. Точнєйше, чи то може буц перспектива и за медиї на меншинских язикох, хтори на тарґовищу чежко годни витримац конкуренцию.

Векшина приватизованих медийох ище вше почитую континуитет програми, та и програму на язикох националних меншинох по системи котру достали зоз купованьом медия, а функционую и меншински медиї чий снователь держава лєбо национални совити, та меншинска медийна сцена углавним очувана.

Медзитим, гоч ше Сербия визначує як барз успишна, и приклад є державом  у Европскей униї, кед у питаню медиї на язикох националних меншинох, муши ше припознац же ше до приватизациї вошло гоч нє було шицко до конца обдумане, а держава ище вше нє ма ефикасни инструменти и достаточни финансийни капацитети за конкурси проєктного софинансованя. Дотациї  прейґ конкурсох би тоти медиї требали доставац за унапредзенє змистох и програмох, алє нєобходни и порядни финансиї за континуитет каждодньовей роботи медийох. У векшини державох Европскей униї тото питанє якош ришене. Даґдзе як добри приклад виступаня держави зоз медийней сфери, а даґдзе анї нє. Чи єст алтернативни ришеня?

ДВОЙНЇСТА МЕНШИНА

Радио Rusyn.fm медий цивилного сектору зоз Словацкей, а слово о интернет радио станїца по руски, чий власнїк здруженє Русин Медия.

Почали робиц полни зоз ентузиязмом, хтори их отримовал, и отримує уж пейц роки, кельо радио наполнї у децембру.

Сотрудзую зоз лемковским Lem.fm зоз Польскей, хтори их и инспировали на тот крочай, припознава Петер Штефаняк, єден зоз сновательох.

Петер Штефаняк

Петер Штефаняк

– На єдним шветовим стретнуцу младих Руснацох зоз швета стретли зме ше зоз колеґами зоз радия Lem.fm, хтори теди почал робиц. Похопели зме же и ми у Словацекей маме таки проблем, же бизме дзечнє слухали радио по руски, та нам пришла на розум идея же кед уж и Лемки маю свой радио  –  направиме и ми. Идея, у першим шоре, була задумана як интернет радио за младих Руснацох зоз Словацкей, же би могли слухац музику, и руску бешеду, а тераз доставаме порученя же нас и старши слухаю.

Роботу коло снованя интернет радио станїци започали пецеро людзе, добродзечно, попри других каждодньових обовязкох, хтори нє мали превельо новинарского, або технїчного искуства. Жадали дополнїц простор, же би мали радио на руским язику ровно єднак. Бо, гоч у Словацкей постоя програми на язикох меншинох, з оглядом на велькосц, по руски мали лєм даскельо годзини до тижня.

–  Тоти людзе хтори мали задумку, як я наприклад  –  нє мал сом искуство за собу же бим бул модератор, або редактор, алє барз було добре же зме познали чловека хтори мал технїчне знанє и робел на других радио станїцох  у Словацкей, та знал цо нам од технїки треба: яки компютери, слухалки, диктафони, програми … Бул вон задлужени за технїку и ище штверо редакторе, алє кажде зоз нїх то робел добродзечно, у своїм шлєбодним чаше, односно, попри роботи, або школи – бешедує о початку роботи Петер Штефаняк.

МИСИОНЕРЕ З ВЛАСНИМА МОЦАМИ

Мисия того младого интернет радия нє лєм продуковац медийни змисти по руски, алє и промововац кодификовани руски язик, хтори у Словацкей кодификовани аж 1995. року. (Отже, за розлику од нашого бачванско-сримского руского язика хтори кодификовани уж скоро сто роки и вецей нє ма живущу алтернативу, на просторох Горнїци хаснує ше числени диялекти и бешеди.)

– Намагаме ше же би ше хасновало кодификовани язик, бо кажди редактор зоз другого валалу и кажди принєше свой диялект, а русинске школство у нас, у Словацкей, нє иснує. Єст институт Русинского язика, можеце го студирац, маме єдну основну школу, а анї єдну ґимназию, односно штредню школу. За розлику од Сербиї, дзе Руснаци одмалючка научени же то наш язик, и ми треба же бизме хасновали тот, а нє кажде свой диялект – токлує Штефаняк.

ПЕРШЕ ИНТЕРНЕТ, А АЖ ВЕЦ ФРЕКВЕНЦИЯ

Того року, початком децембра, Радио Rusyn.fm наполнї 5 роки роботи. Гоч почали як младежски интернет радио, тераз го слухаю шицки, а од даскелїх новинарох на початку, тераз их у колективе єст шеснацецеро. Медзитим, гоч после пейцох рокох успих очиглядни, Штефаняк гвари же реґуларну фреквенцию ище нє сцу вжац.

– Зоз интернет радиом зме почали пре вецей причини. Перше зме плановали же би то бул радио за младих, а и тренд у швеце таки же шицко идзе на диґитализацию, на интернет. Нє треба куповац фреквенциї хтори драги, и знали зме и швидше зме то могли поробиц, туньше було, а могли зме провадзиц и кельо нас людзе слухаю. Тиж так, кед же дацо будуєме, а радио ище вше будуєме, вельки ризик такой вжац фреквенцию, прето же то у нас барз велька инвестия – мушиме ше явиц на конкурс же бизме ю достали, потим ю плациц, без огляду чи нас дахто слуха чи нє, а то  ризик. Так же, покля радио нє будзе абсолутно стабилни и нє будзе мац стаємних людзох хтори свою роботу знаю робиц на професийним уровню и док зме годни и без потримовки держави и Влади можеме сами финансовац радио, потамаль жемову фреквенцию нє будземе брац – мудро роздумує Штефаняк.

Медиї цивилного сектору у Сербиї ище нє нательо зажили, но приклади зоз наших заєднїцох  хтори жию у европских державох нам  можу вельо помогнуц. Гоч маме длугу и богату традицию „державного” информованя на мацеринским язику, искуства у обласци алтернативних медийох нє маме анї тельо кельо редакция Русина.фм, хтора почала робиц лєм пред пейцома роками. Єст ше на кого упатрац, алє найзначнєйше, як подцагнул Петер Штефаняк, до такого проєкту треба войсц рационално и подполно обдумано, а нє напамнят.

rusyn fm fb page

 

ПОВЯЗАНИ ТЕКСТИ