Шедзим у автобусу хтори троши километри нєпреглядного пространства Африки, заобиходзаци природу и пейзажи котри як кед би припадали даякому видуманому швету. Пришла сом до Танзаниї волонтирац, меняц швет, доприношиц, же бим у своїм краткорочним жемским тирваню пошвецела часц свойого живота тим, котри у потреби.

После 6 000 км, моя идея и потреба за авантуру, обила ше о стварносц. Сцигла сом до Аруши, места дзе живот спомалшени, место дзе улїци полни з прахом, место дзе жию людзе попреплєтаних идентитетох и дзе єст вельофарбово пияци. Жиєм у локалней фамелиї котра ма седем членох и ище дзешец волонтерох зоз цалого швета. Єме традицийни єдла, нє маме цеплей води, власи сушиме вечарами, док шедзиме коло огня и дружиме ше. Кажди дзень ходзиме робиц до школи, прескакуєме потоки, преходзиме през пусти валали, лєси, єме банани хтори наобераме през драгу, бавиме ше з дзецми и обовязно ше голєм раз на дзень даґдзе страциме. Найинтересантнєйши дожица вязани за глєданє драги кед ше змеркнє, бо нєт струї, телеґрафи, нє помагаю анї мапи на телефонох, анї гвизда сивернїчка. Кажде рано нас випровадза молга през хтору ше пребива слунко, жени котри ноша вельки кабли полни зоз жридлову воду и дзеци хтори бежа за нами и питаю лакотки.    

А у школи, хорски дочек и привитованє професорох. Дочекує нас нова авантура, знаходзенє без кнїжкох, крейдох, паперу, гладни дзеци у дзиравих ципелкох. Дочекую нас з розширенима руками, щешлїви пре кажди надути балон и фломастер у фарби. Попри тим, кажди дзень одходзиме до дому за дзеци хторих родичи зохабели, до дому дзе ше школую дзеци далєко од своїх родичох и домох. Ношиме им шмати, муки, пасулї, рискаши, мидла и цукру, полни мехи шицкого цо им нєобходне.

МАЛИ ДЗЕЦИ ВЕЛЬКОГО ШЕРЦА

Африка найхудобнєйши и найнєрозвитши континент. Аж 6 000 км до милион гладних дзецох, 6 000 км до дому дзе дзеци буду мац три оброки дньово, лєм кед им дахто принєше. Часто им нїхто нє приноши. На уходзе до дому стоя розруцани рижнофарбово папучки хтори ше як слика моментално урезую до нашей колективней подсвидомосци и отвера очи часточно шлєпей публики, а на самим уходзе, любопитлїви погляди стоцецерих дзецох и цихосц як найгласнєйши одвит. Дзелїме им шмати, ошмихи, бавиме ше з нїма, купаме их… Правим вельо фотоґрафиї того дня, слики малих дзецох велького шерца, вельких очох и рукох хтори питаю. Сликуєм их зоз жаданьом най их цо вецей унєшем до ока и винєм тоту часточку дзецинскей щиросци зоз рамикох того простору и часу. После рижних бавискох, шмиху и друженя, на шоре молитва пред одход дзе вони дзекую нам, а ми им, бо зме свидомо пришли меняц їх животи, а нєсвидомо вони меняю нашо. Розход вше провадзени зоз питанями кеди, и чи ище дакеди придземе, и зоз слизами место словох котри шерцо нє може виражиц.     

ВИНЧАНЄ ПО ОБИЧАЙОХ МАСАИ ПЛЕМЕНА

Нашу каждодньовосц украшує єдна красна подїя кед ше двойо волонтере зоз Шпаниї ришели повинчац у масаи племену по шицких обичайох, традициї, з музику и танцом. Одходзиме на пияц покуповац рижнофарбово облєчива и прикраски, а млода и млоди бритвя глави як остатнє пририхтованє пред винчаньом. Винчанє ше отримує у штред пустинї, далєко од цивилизациї, шпиме под шатрами, з гвиздами над нами, а дзивима жвирами коло нас. Свадзба почина вчас рано зоз обичаями украшованя млодей, док млоди одходзи зоз племенскима хлопами забиц животиню котру принєшу на дарунок племену. Зоз традицийним танцом скаканя до висока и звискованя женох зоз племена, преходзиме зоз єдного валалу до другого же би ше отримало винчанє и почала госцина. Масаи то номадски народ котри жиє без струї и води, оддалєни од населєних местох, преходза вельки роздалїни, пестую овоци, желєняву, маю стада кравох и збераю лїковити трави. Облєкаю ше до шматох дречавих фарбох, бритвя главу и до ухох кладу прикраски хтори им видлужую ухово рецочки. На два днї зме припадали племену, дзе з часом ище вше управяю виход и заход слунка, дзе ше простор огранїчує лєм зоз горами и саванами, дзе жию чуваре ошмиху и дзе ше щесце мера зоз шмихом, фасцинантни и ориґинални припаднїки племена того подручя хтори жию у складзе медзи собу и у складзе зоз природу.

ЧИ ЗМЕ СВИДОМИ ШИЦКИХ „АФРИКОХ” КОЛО НАС?

Спомалшени ритем Африки нас провадзи и на чудесним сафарию, авантура хтора нам приблїжує африцки савани и джунґли, алє и животинї котри жию у своїм природним околїску. Африка наполнєла мойо шерцо и мойо меморийски карточки.

Кажда фотоґрафия виткана од того цо мойо око видзело, а шерцо прияло. Нє може фотоґрафия Киламанджара, сафария, савани, або масаи племена виприповедац мою приповедку. Тото цо вельки очи моїх школярох поручую швету нє може сообщиц анї єден волонтер, анї єден дипломата, анї єдна фотоґрафия. Мойо фотоґрафиї можу лєм дотхнуц велї шерца, можу уплївовац на совисц и свидомосц, можу пошведочиц, одкриц, славиц, гуториц у мено тих котри нє можу гуториц, або чий глас нє чуц досц далєко. Фотоґрафия може занавше замарзнуц хвильку же би нє сцекла, може пренєсц фарби, место, алє нє и емоцию, бо вона нє може стануц до рамикох єдней фотоґрафиї. После 6 000 км ше врацаме до наших малих шветох, до своїх малих животох, зоз нашима малима проблемами, да маме кельо маме и да похопиме же нам праве тельо досц. Врацаме ше зоз питаньом чи зме дотхли досц души, чи зме виволали досц ошмихи, чи жиєме достаточно животи, чи зме свидоми шицких „Африкох” коло нас. И кажди раз кед нам ше у празней кишенки збунї рука, видзиме малих юнакох чийо швицаци очка поганьбя каждого з нас. И тебе, и мнє.

Фото: Мая Орихан