БЕОҐРАД – Министер култури и информованя Влади Републики Сербиї Владан Вукосавлєвич и предсидатель Покраїнскей влади вчера у Министерстве подписали контракт о преруцованю средствох за вибудов нового будинку Радио-телевизиї Войводини. Министерство култури и информованя АП Войводини за тоту намену опредзелєло 400 милиони динари.
Министер култури после подписованя контракту гварел же у НАТО-бомбардованю 1999. року звалєни шицки штири главни и пейц помоцни обєкти РТВ и од теди роби у барз очежаних условийох, як и же вибудов нового обєкту на 17 500 квадратних метерох, на месце дзе терашнї руйновани будинок, подзелєни до штирох фазох – проєктованє, розчисцованє терену, вибудов и пущанє до роботи обєкту.
Министер Вукосавлєвич виражел наздаванє же 400 милиони динари, з єдну значну инвестицию АП Войводини, будзе ришени проблем простору за РТВ, як и наздаванє же нови будинок будзе закончени за два роки.
Предсидатель Покраїнскей влади Иґор Мирович з тей нагоди виявел же Войводина пририхтала проєкт за видов обєкту РТВ, штредком мая достата будовательна дозвола, пририхтани и шицки потребни документи и же пошвидко будзе розписана явна набавка за першу фазу роботох.
– З нову владу Сербиї будземе бешедовац о реализованю другей фази, а то историйно важни проєкт, бо РТВ барз значна установа за цалу Сербию пре емитованє програмох на язикох националних меншинох – гварел Иґор Мирович.