ОПШТИНА КУЛА – Министер просвити, науки и технолоґийного розвою Младен Шарчевич зоз сотруднїками вчера нащивел општину Кула, дзе у шветочней сали Општини Кула участвовал на схадзки Активу директорох образовних установох општини, а потим нащивел Школу „Петро Кузмяк” у Руским Керестуре и ОШ „Вук Караджич” у Червинки.
У керестурскей Школи Министра Шарчевича зоз предсидательом дочасового орґану Општини Кула Велибором Милоїчичом дочекали директорка Хелена Пашо Павлович и єй сотруднїки, заняти у Школи и школяре.
На уходзе го зоз хлєбом и солю дочекали школяре облєчени до сербского и руского народного облєчива, а єдну руску шпиванку за ньго виведли ґимназиялки руского оддзелєня. Министер потим нащивел годзину математики зоз роботику у шестей класи зоз професорку Наталию Будински хтори му демонстровали часц своєй настави.
Потим як обишол и просториї у Доме школярох, министер свою нащиву предлужел у Червинки у тамтейшей Основней школи дзе го дочекала директорка Наташа Дєрич, дзе потим дал вияву за медиї.
