ЗОМБОР/РУСКИ КЕРЕСТУР – На схадзки з министром култури и информованя Владаном Вукосавлєвичом под час його нащиви Зомбору штварток, 9. марца, присуствовали и чолнїки општинох у Заходнобачким округу, як и дзепоєдних установохо у култури, медзи нїма и предсидатель Општини Кула Перица Видеканїч, предсидатель Скупштини општини Кула Велибор Милоїчич и о.д. директора Дому култури Руски Керестур Йоаким Рац.
Як преноши портал „соинфо”, попри хасновитей черанки информацийох, односно упознаваня зоз станом у обласци култури у Городзе Зомбор, та општинох Кула, Оджак и Апатин, дзе углавним визначени проблеми у финансованю и потреби за инвестицийнима укладанями до обєктох, министер Вукосавлєвич присутним предочел и нову програму Министерства култури „Городи у фокусу”, як и други конкурси Министерства. Тиж так, представени и основи принципи будуцей стратеґиї културного розвою.
Як за Рутенпрес гварел Йоаким Рац, представителє Општини Кула министрови винєсли проблем и вельку потребу за векшим инвестицийним укладаньом до оправяня Дому култури Руски Керестур, хторе ше одноши на реконструкцию закрица, замену дотирвалих облакох, алє и на реконструкцию и осучасньованє бини и сцени Дому култури у Велькей сали.
Як гварел Рац, порадзене же по тим питаню министер Владан Вукосавлєвич пошвидко приме делеґацию Општини Кула, Дому култури и Националнго совиту Руснацох.