РУСКИ КЕРЕСТУР – Мирко Афич, Михайло Венчельовски и Владимир Планкош завжали перши три места на валалским Шаховским турнире хтори од 26. фебруара по 2. марец орґанизовал Шаховски клуб (ШК) „Русин” з Руского Керестура.
Бавело ше по швайцарскей системи – 9 кола по 30 минути по бавячови. Найлєпши Афич освоєл златну медалю з 8 поенами, Венчельовски стриберну зоз 7, а бронозову Планкош зоз 6 поенами, кельо мал и Рафаил Венчельовски, алє мал слабши Бухалц коефициєнт.
На Турнире участвовали 14 бавяче, углавним члени Клубу. Наймладши медзи нїма бул Давид Надь, котри як таки достал и погар, а найстарши бавяч бул Любомир Хома. Турнир потримали валалски тапетарнї „Хома”, „Клуб 10” и „Комфорт”.
По словох предсидателя ШК „Русин” Михайла Венчельовския тот турнир, як и ище єден хтори познєйше планую отримац, служа як пририхтованє шахистох за початок першенства у лиґи Мол-Зомбор хторе би мало почац у маю.