Мирослав Малацко перши у Сербиї у рецитованю

автор маф
1.2k Опатрене

ВАЛЄВО – На 50. Смотри рецитаторох Сербиї „Поето народу мойого”, отриманей у Валєве 18. и 19. мая, Мирослав Малацко з Руского Керестура освоєл перше место у катеґориї старшого возросту, а з тим вон и перши хтори на тим, найвисшим змаганю рецитаторох у держави, победзел з писню по руски.

Мирослав рецитовал писню „Псалом смутней нєвести”, чий автор Хорхе Рогас, а хтору на руски язик преложела Гелена Медєши.

На тей ювилейней Смотри, хтору орґанизовал Союз аматерох Сербиї и Центер за културу Валєво, змагали ше 105 рецитаторе, по 35 у каждей катеґориї.

Пияток, 18. мая, змагали ше рецитаторе у штреднїм возросту, а у тей катеґориї з писню по руски рецитовала Валентина Новта з Керестура, док ше ютредзень змагали рецитаторе у младшим, як и старшим возросту, у хторим, попри Малацка, по руски рецитовала и Тимеа Будински з Керестура.

Зоз кулскей општини ше змагали вкупно шесцеро рецитаторе и посцигли замерковани успих, понеже у старшим возросту, попри першонаградзеного Малацка, треце место завжала Катарина Перович з Кули, а штварте Стефан Ковиянич, тиж так зоз Кули. З того места ше змагал и Лука Ноґавица у штреднїм возросту.

Змагательох оценьовала пейцчлена комисия, чий предсидатель бул професор дикциї др Радован Кнежевич, потим ґлумица и професорка дикциї мр Андрияна Виденович, ґлумец и професор ґлуми Деян Цицмилович, ґлумица Марияна Андрич и писатель Драґан Йованович Данилов.

Рецитаторох у Керестуре порихтали Ивана Дудаш и Мая Зазуляк Гарди, а у Кули Слободан Ноґавица.

ПОВЯЗАНИ ТЕКСТИ