З часу на час дахто спомнє же док мало будземе мушиц увожиц роботнїкох. Програмере нам стандардно дефицитарни и кед бизме их инстант створели 20 тисячи – були бизме на нули, тельо их у тей хвильки хиби. Будователє буду тиж так хибиц, гваря политичаре, а и професийни кухаре випатра же буду дефицитарни, а список ше ту нє закончує. Дахто би подумал же нам наисце так добре идзе же зме викоренєли нєзанятосц, алє правда цалком иншака.
Правда же прешлого року зоз жеми пошло коло 32 тисячи людзе и то податок лєм за прешли рок. Медзи нїма 15 проценти високо образованих, як ше гвари, интелиґенция. Кед вам кажди рок пойдзе тельо людзох, вец бисце требали положиц палєц на чоло, добре розштудирац о тим цо вам ше случує у жеми и требали бисце престац бешедовац о тим як нам добре идзе, понеже вас реалносц озбильно демантує. Нє може ме нїхто прешвечиц же дахто идзе зоз тей жеми прето же му нє знам як добре, та ше, сеґинь, идзе трапиц до иножемства. Га, „царе”, идзе прето же нє може скапчац „од першого, по перши”. Идзе прето же там дзе идзе будзе нормално плацени за свою роботу, прето же му ше зґадзело менянє странкох же би затримал роботу, прето же закончел школу и покладал испити, а други купели диплому, лєбо плаґирали дипломски, мастер, лєбо нє дай боже докторску тезу, идзе прето же му нєдобре од бирократиї хтора го кочи кед сце почац даяку свою роботу, идзе прето же нє може чекац „X” мешаци же би сцигол на шор у дохтора и ище „X” мешаци, лєбо роки на операцию, „ЦТ” лєбо маґнет, прето же дзеци лїчиме зоз СМС поруками… могол бим чишлїц до рана.
И на шицко тото держава гвари „йой, сташне, будземе мушиц увожиц робтонїкох”, место же би почала ришовац проблеми. Ушор державу, змоцнюй институциї и найважнєйше – дзвигай стандард. Нє значи Перови, Дюрови, а анї мнє нїч кед дахто пове же плаци скочели за нє знам кельо проценти и же нам БДП рошнє як нїґда по тераз, кед я тото нє почувствуєм у бутєлару. И нє ясне ми: прецо би дахто пришол баш до Сербиї робиц? Квитню ружи, чури мед и млєко? Чежко. Кед дахто идзе зоз жеми же би нашол роботу, идзе там дзе му будзе лєпше, а тот дахто кед би сцел присц до Сербиї, вироятно би ше розпитал и яка ситуация у других околних жемох и думам же би му Сербия вообще нє була топ-дестинация, так же и зоз тей ґениялней идеї о увозу роботнїкох чежко же будзе дацо.
А тото нас шицко враца на стару народну „кельо пенєжу, тельо музики”. Лєбо, прилагодзене нашей ситуациї – дзвигнї стандард, та ци людзе нє буду одходзиц, а кед баш будзе хибиц роботнїкох, лєгчейше их „прицагнєш”. А нягай ме зоз сказками о БДП-у и рекордних просекових плацох, зоз таку приповедку лєм ше соля рани хтори нє мож з приповедку залїчиц.
Становиска висловени у тим тексту виключно авторово и нє вше одражую ушорйовацку политику новинох „Руске слово”.