Млади активни и творя, потвердзене на стретнуцу

автор мар
837 Опатрене

РУСКИ КЕРЕСТУР − Всоботу, 4. авґуста, на озерку у Руским Керестуре отримане музично-литературне стретнуце младих авторох у рускей заєднїци котре орґанизовали Здруженє младих „Pact Ruthenorum” и младежски часопис „Мак”.

На стретнуцу були представени литературно-музични твори дзевец младих авторох, з котрих векшина ище вше нєафирмована, алє слово о авторох чийо твори були обявйовани у „МАК-у”. Представена була и вистава авторских фотоґрафийох котри тиж обявйовани у тим часопису.

З авторскима музичнима шпиванками наступели Себастиян Надь з Руского Керестура и Михаил Рамач з Дюрдьова котри тиж и читал власни стихи. Свою твит литературу, цо єй способ роздумованя наглас, представела Емилия Чизмар з Коцура. Були пречитани и стихи нових авторох Дениса Надя и Томия Раца, як и проза Кристияна Сопку, а власни стихи поезиї на руским язику пречитали Кристина Афич и Жарко Остоїч, шицки з Керестура. На концу, през интересантни видео знїмок бул представени и други роман Александри Живкович Бучко, „ЛЮСПП”.

През дебату по законченю програми млади авторе похвалєни за свою творчосц, а як медзи иншим поведзене, орґанизаторе на списку мали ище даскельо особи котри пре обєктивни причини нє присуствовали, як и же єст сиґурно тих котри ище вше пишу лєм за себе, цо и потвердзенє же руска заєднїца ма младих котри творя. Понеже и того вечара були читани стихи авторох котри потераз були обявйовани лєм под псевдонимами.

ПОВЯЗАНИ ТЕКСТИ