РУСКИ КЕРЕСТУР – Дзецинска драмска ґрупа Драмского студия АРТ Дому култури Руски Керестур з представу „Перша журка” Тодея Николетича, у режиї Ксениї Бодянец, од 19. по 21. юний госцовала у Словацкей, на Седмим Театралним фестивалє „Михаловски дески”.
Госцованє витворене на поволанку орґанизатора Фестивалу – Восточнословацкого здруженя „Валал”, так же домашнї Керестурцом бул и предсидатель того здруженя Марош Воловар.
Штернацецеро основношколци, режисерка представи Бодянцова, учашнїки у представи як технїка Сашо Палєнкаш и Михайло Бодянєц, як и предсидатель Вивершного одбору Националного совиту Руснацох Желько Ковач, у Словацкей були змесцени у Земплинскей Теплици, а у рамикох Фестивалу одбавели два представи за школярох – вовторок, 20. юния у Будковцох, а 21. юния у Земплинскей Теплици.
Домашнї за госцох орґанизовали и розпатранє местох дзе госцовали, екскурзию на озеро Земплинска Ширава, а у врацаню нащивели Кошице.
Як гварела режисерка Ксения Бодянец, млади керестурски ґлумци представу одлично одбавели, публика их розумела и жила вєдно зоз збуваньом на сцени, а источашнє то була и коруна вецейрочней роботи з тоту ґенерацию ґлумцох, понеже векшина з нїх маломатуранти.
Одход до Словацкей финансовал Дом култури, а комби-превозки обезпечели Школа „Петро Кузмяк” и Национални совит Руснацох.
Тогорочни Фестивал „Михаловски дески” будзе заварти на ютре, 24. юния, а почал пондзелок, 19. юния.