Млади означели свой дзень у Вербаше

автор Але
1.6k Опатрене

 

През викенд у Вербаше зоз вецей програмскима змистами означени Медзинародни дзень младих у орґанизациї Канцелариї за младих општини Вербас, алє и других вербаских здруженьох и орґанизацийох. Преслава почала дзень скорей, 11. авґуста и тирвала цали дзень, а предлужело ше  юи през цали викенд.

Пияток, у ранших годзинох отримани турнир у шаху за дзеци и младеж хтори тирвал до штернац годзин. Участвовали коло двацецеро дзеци, а шицким учашнїкох подаровани школски прибор як помоц на початку школского рока. Од штернац годзин млади зоз Здруженя инвалидох Вербас и волонтере зоз вербаского Едукативного центру и зоз Червеного крижа анкетовали гражданох Вербасу о положеню инвалидох у општини. Як толкую зоз ДИВ-а, на  анкету одвитовало вельке число гражданох и вона будзе барз хасновита же би дружтво достало повратну информацию о тим кельо Вербащанє упуцени до потребох и проблемох инвалидох, алє поможе и у унапрямйованю будуцих активносцох.

Од петнац годзин у просторийох Канцелариї за младих отримана презентация роботи Здруженя „Мултиартˮ и їх акциї „Вожаче доброго шерцаˮ. Акция унапрямена на обезпечованє помоци превозки дзецом и младих хтори маю почежкосци у тїлесним, або менталним розвою, алє и младежи хтора у чежкей материялней ситуациї. Потим отримана и вистава малюнкох членох того здруженя.

Од седемнац годзин отримане преподаванє на тему „Злохаснованє психоактивних субстанцохˮ у координациї зоз Полицийну станїцу Вербас. Преподаванє тримали инспекторе и полицийни роботнїки зоз тей установи, а найвецей ше бешедовало о чкодлївосци опиятох и файтох хтори постоя. Компетентни зоз дзецми и младима бешедовали и о ситуацийох у хторих ше можу найсц зоз конзументами або тарґовцами наркотикох и дали конкретни совити и приклади як ше у таких и подобних ситуацийох треба справовац.

Всоботу, млади зоз Здруженя гражданох „Музика на кубˮ орґанизовали заєднїцки концерт локалного, авторского бенду „Цер фур церˮ и новосадску ґрупу „Доджоˮ. Свойофайтови перформанс отримани у сали биоскопа „Югославияˮ и бул провадзени з видео проєкциями. Окремна часц програми були дружтвено анґажовани тексти писньох младих уметнїкох.

Концерт локалних бендох хтори требал буц пияток вечар пре подлу хвилю преложени на нєдзелю кед на площи опрез городского Музею наступели бенд зоз Кули „Хеви вакˮ, вербаски бенд „Мултиґенерацияˮ и состав хтори твори авторску музику – „Блоуˮ. Истого дня у центру ше предавало карти за вельки, гуманитарни концерт ґрупох „Неверне бебеˮ и „Ничим изазван” хтори бул вовторок, а шицок пенєж од картох унапрямени на помоц Макшовей фамелиї, хтора у транспортним нєщесцу остала без двоїх членох.  Без огляду на подлу хвилю, шицки подїї провадзело вельке число гражданох.

СВОЙОФАЙТОВИ ИНТЕРНЕТ КЛУБ

Канцелария за младих општини Вербас основана 2009. року, а 2012. року достала свойо просториї у строгим центру города. Тераз у нєй єст дзешатки компютери, скенер, друковач и друга рахункарска опрема, та вона функционує як свойофайтови интернет клуб за младих, хтори шицко тото можу хасновац за забавни, алє и едукативни роботи.

Прешлого року Канцелария зоз Министерства за младеж и спорт достала 1,2 милиони динари хтори унапрямела за купованє монтажней бини, так же орґанизованє и тей, алє и велїх других подїйох, од тераз вельо лєгчейше и туньше.

ПОВЯЗАНИ ТЕКСТИ