Мож ше приявиц за участвованє на „Акустики Рутеники”

автор ркц/ядю
1k Опатрене

НОВИ САД – Млади зоз Руского културного центру у Новим Садзе и того року орґанизую музични вечар „Акустика Рутеника”, хтори будзе отримани 29. септембра того року и поволує музичарох же би ше приявели за участвованє на нїм.

Орґанизаторе жадаю приблїжиц руску музику‚ як народну так и забавну, младшим ґенерацийом, цо ше на прешлорочней „Акустики Рутеники” указало як успишна идея.

Виводзаче и того року буду мац нагоду прилагодзиц руски музични скарб ґу свойому смаку, цо годни витвориц праве на музичним вечаре „Акустика Рутеника”, а акцент програми будзе на креативносци музичарох у акустичних обробкох шпиванкох.

Орґанизаторе понукню вибор шпиванкох у забавним и народним духу хтори можу буц обробени.

Под акустичним виводзеньом орґанизаторе подрозумюю виводзенє шпиванкох хтори буду провадзени з инструментами як цо, наприклад, акустична ґитара, буґни, кахун, гармоника, тамбура, смиково инструменти, дуйни инструменти…

По пропозицийох, кажди виводзач може вивесц єдну нумеру сам (шпивац и грац на инструменту/ох), провадзиц шпивача/шпивачох на инструменту як провадзаци вокал, лєбо у дуету, буц часц музичней ґрупи.

Приявиц ше можу шицки заинтересовани музичаре и шпиваче од 15 по 40 роки на мейл адресу akustika.rutenika@gmail.com по 1. септембер.

У мейлу у хторим ше виводзаче приявюю за участвованє треба написац мено, презвиско, кратку биоґрафию, а потим им орґанизаторе пошлю список шпиванкох.

ПОВЯЗАНИ ТЕКСТИ