Музика злучує людзох

автор олена планчак сакач
1.1k Опатрене

Каждого року зоз Фестивалом новей рускей народней шпиванки „Ружова заградка” отвера ше фестивалску сезону, бо вон перши у календаре културних збуваньох при Руснацох. Фестивал и по пропозицийох змагательни и вше приноши єдну файту атмосфери очекованя побиднїка у вецей обласцох, у музики, интерпретациї и найкрасшого тексту.

Нє першираз ше случело же фахови жири и публика у сали Студия „М” вибрали исту композицию, алє таки стан фактох потвердзує же вибрана композиция „Я вандруєм” Татяни Колєсар Ґвоїч, хтору одлично одшпивал Марко Радишич, на текст Татяни Беук Латяк и у аранжману Мичи Янковича будзе мац свой живот при публики.

Тогорочни Фестивал бул у рамикох стандардного квалитету, указал свою виталносц тирваня, бо 27 роки то нє кратки период у котрим ше го отримує, а окрем ентузиязму поєдинцох, вон нєшка орґанизовани и з боку музичних фаховцох. Фестивал випестовал велїх младих вокалних шпивачох, даєдни композициї прежили и популарни су и слуха ше их и нєшка.

Того року композициї були обдумани у веселшим духу, розбили нашу стаємну меланхоличносц у музики, а тому допринєсли и упечатлїви, нови аранжмани композицийох, як и богатство звуку у велїх инструментох. Обачиц було же наступели и вецей хлопи як цо то узвичаєно, а тот Фестивал уж традицийно ма свою вирну публику, та сала у Студию „М” була полна полнючка, глєдало ше место вецей, а атмосфера була права фестивалска, гоч ше го преношело и прейґ радио габох, ТВ-а и интернет мрежи.

Як то уж узвичаєне пред Фестивалом отворена вистава малюнкох Андєлки Античевич, аматерскей малярки зоз Беркасова, а у ревиялней часци представени Дюра Латяк, публициста, писатель и бувши главни и одвичательни редактор и директор НВУ „Руске слово”, зоз свою богату творчосцу як текстописатель на тим Фестивалу, на котрим участвує од самого снованя.

Упечатки ше злєгую, после Фестивала шицки зме обогаценши за єдно приємне дожице, бо музика нє монолог, вона вше у комуникациї зоз публику, єй нє потребни преклад як писаному слову, вона универзална и вше у диялоґу, музика злучує людзох.

ПОВЯЗАНИ ТЕКСТИ