ШИД – Од Велького штвартку, пиятку и соботи, у церкви Преображеня Господнього служени богослуженя, а на Вельки пияток було Христово хованє з покладаньом плащанїци.
На Перши дзень Велькей ноци, парох о. Михайло Режак на 10 годзин служел шветочну Службу Божу з пошвецаньом паскох. У церкви було надосц вирних, окреме млади и дзеци, а у порти пошвецени коло 40 кошарки з пасхалним єдзеньом. Другого дня швета було мированє, а богослуженє служене и на Треци дзень швета.
Торжествено було и у церквох у Беркасове и Бикичу дзе богослуженя служел парох о. Владимир Еделински Миколка. На сам дзень Велькей ноци на осем годзин була Служба Божа з пошвецаньом кошаркох у церкви у Бикичу, а потим на 10,30 годзин у Беркасове.
У Бикичу пошвецени коло 30 кошарки, а у Беркасове 11, а на Други дзень швета було и мированє. Того дня на 14 годзин бул традицийни благослов гробох на теметове у Беркасове, а на 15 годзин у Бикичу.
