РУСКИ КЕРЕСТУР – На самим концу прешлого 2018. року, 30. децембра, отримана порядна Рочна скупштина Карате клубу „Русин” у ресторану „Червена ружа”, а за найуспишнєйшого каратисту преглашени Ґлориян Штранґар.
Предсидатель Клубу, Михайло Орос, представел звит цалорочней роботи, з акцентом же резултати барз добри з оглядом же Клуб наступал у рамикох другого союзу, ВКФ карате союзу дзе критериюми оштрейши, а конкуренция масовнєйша и моцнєйша.
У Клубу тренираю 24-еро члени, седмеро у катеґориї юниорох котрих тренирали Владислав Рамач и Михайло Орос, а у катеґориї пионирох, школярох основней школи тренирали 17-еро, а з нїма робели Йована Ноґавица, Михайло Орос и з часу на час Марина Надь.
Каратисти участвовали на 13 змаганьох – урядових, турнирох и на школским Войводянским, дзе вкупно освоєли 13 медалї, седем з урядових змаганьох и шейсц зоз турнирох. Значни успих и же ше Сара Планчак у пионирскей катеґориї на Войводянским змаганю пласовала на Републичне котре будзе отримане у априлу того року.
За найуспишнєйшого спортисту у прешлим року преглашени Ґлориян Штранґар з пионирскей катеґориї котри ма белави пас, а змагал ше и у борбох, и у катох. На Зонским змаганю освоєл перше место и у катох и у борбох, на Войводянским першенству завжал треце место у катох, на Дунайским купу треце место у борбох и на Турниру у Зомборе освол два стриберни медалї – у катох и у борбох.
Цо ше дотика финансийох, Клуб директно завиши од добрей дзеки родичох и рижних донаторох, алє рок вшелїяк закончени з позитивним рахунком. Понеже порядни средства котри за спорт видвоює Општина Кула уплацени аж у октобру, потамаль ше Клуб знаходзел на рижни способи, та аж и з пожичками. Одходи на змаганя директно финансую родичи дзецох котри участвую.
До Жимского карате кампу у Апатину, котри будзе отримани од 8. до 13. януара, з Клубу пойду Ґлориян Штранґар и Сара Планчак котри найактивнєйши члени, а трошки зноши Клуб, односно зоз средствох котри донирал єден бувши член.
Як поведзене, нєт проблеми зоз простором за трениранє, понеже простор у Спортскей гали присподобену ґу потребом Клубу, а и шицки будуци змаганя мож отримац у гали.
На Скупштини представени и плани з нагоди означованя 40. рочнїци Клубу котра будзе идуцого 2020. року. Плановане же би керестурски Клуб бул домашнї рижним турниром и урядовим змаганьом котрим союз орґанизатор.
