КОЦУР – Пре упознаванє з наутично-туристични потенцияли Сербиї, окреме Дунаю и беґельскей мрежи у Войводини, преводнїцу у Коцуре стреду, 10. мая нащивели представителє Медзинародней асоцияциї за нукашнї плївни драги Inland Waretways International (IWI). Предсидателя IWI Дейвида Едвардса Мея и предсидателя Дунайского пропелеру Крсту Паштовича, як и числених госцох зоз ЗАД, Анґлиї, Французкей, Голандиї и Белґиї дочекали представителє ЯВП „Води Войводини”, Еколоґийного руху Вербасу и Месней заєднїци Коцур.
– Нащива Коцуру часц седмодньовей студийней нащиви, з хтору ше професионалци, чолнїки наутичних здруженьох и специялизованих компанийох з Европи и ЗАД упознавали з наутично-туристичнима потенциялами Сербиї, окреме Дунаю и основней беґельскей мрежи у Войводини. Обчекуєме же информациї хтори достали преширя по европских наутичних центрох, пре евентуални будуци нащиви европских наутичарох нашим плївним драгом, алє и пре интерес за укладанє до туристичней инфраструктури на наших рикох и беґельох, як и за лобированє у европских фондох за безповратни средства – сообщене з Еколоґийного руху Вербасу, а преноши портал Општини Вербас.
У Коцуре госцом представена идея дальшого збогацованя простору зоз спортско- рекреативнима змистами, вибудову медзинародного кампу за отримованє водових драгох з еко-визир центром и ище єдним озбильнєйшим пристанїщом коло преводнїци, цо би мали вибудовац ЯПВ „Води Войводини”.
– Тиж зме достали и числени вредни суґестиї од професионалцох, же кадзи унапрямиц нашо приоритети пре прицагованє странских наутичарох з їх специфичнима потребами – гварел предсидатель Еколоґийного руху Вербасу Ратко Дюрдєвац.