Наша сотруднїца – Сенка Иван

автор МАК
1.2k Опатрене

Сенка Иван з Коцура ше после законченей штреднєй школи за поживового технїчара у Вербаше опредзелєла за цалком иншаки фах. Уписала ше на Одсек за русинистику на Филозофским факултету у Новим Садзе, дзе пред даскельома роками здобула званє мастер професор руского язика и литератури.

Вше любела писац, а то потвердзовали и єй професоре на факултету. Пред штирома роками почала сотрудзовац и з МАК-ом. Тераз други рок як є и вонкашня сотруднїца редакторки, односно, як пише поряднє, за кажде число, глєда нових авторох и сотрудзує з поряднима, пред и после виходзеня МАК-у итд.

IMG_5853_1600x1200

Кед сце з Коцура, лєбо гоч и з даєдного другого места, а сцеце писац за МАК, лєбо обявйовац даяки свойо други твори, знайце же ше можеце явиц и Сенки.

Док студирала, єден час волонтирала у Рускей редакциї на Радио Новим Садзе, як новинарка и лекторка.

Роботу у фаху ище вше нє нашла, та роби у єдним бутику у Новим Садзе…

…А кед раз достанє роботу у фаху, найволєла би робиц як лекторка, лєбо, можебуц, з дзецми.

IMG_5862_1600x1200

За МАК углавним роби интервюи з младима з Коцура, лєбо Вербасу, а то єй, гвари, и найлєгчейше, алє люби пренєсц на папер и даяки свойо думки, упечатки, а з такима текстами и почала писац до МАК-у.

Гвари же люби и ужива сотрудзовац з нашим часописом, а єдине цо єй чежко у тим шицким, то, найсц шлєбодного часу шеднуц за компютер и написац текст.

Донєдавна ходзела на приватни годзини анґлийского язика, а тераз почина учиц и мадярски язик.

IMG_5841_900x1200

Одкеди Сенка почала ходзиц на годзини анґлийского язика до єдного новосадского центру странских язикох, медзи понукнутима язиками хтори у нїм мож учиц находзи ше и наш, руски язик. Як Сенка гвари, нє верела же ше дакеди зяви дахто хто будзе за ньго заинтересовани. Медзитим, на єй нєсподзиванє, єдна особа, хтора ма руски коренї ше приявела, та Сенка од януара два раз тижньово трима индивидуални годзини руского язика.

 

ПОВЯЗАНИ ТЕКСТИ