РУСКИ КЕРЕСТУР – З Архиєрейску Благодарну Службу Божу у катедралним храме св. оца Миколая у Руским Керестуре шестри Служебнїци вчера, 19. марца, шветочно закончели штиродньове означованє 125-рочнїци снованя своєй заєднїци, 70-рочнїци снованя своєй Вицепровинциї св. Осифа, як и 60 роки монашского живота ш. Вероники Ани Гралюк.
На Архиєрейскей Служби присуствовал апостолски нунций у Сербиї архиепископ монс. Лучияно Сурияни зоз своїм секретаром, а Службу предводзели троме владикове – наш еґзарх владика Георгий Джуджар, владика крижевски (Горватска) Никола Кекич и владика скопски Киро Стоянов (Македония). Сослужели коло 20 священїки – госци з України, Словацкей и з наших парохийох, на чолє з домашнїм парохом о. Михайлом Малацком.
Коло 50 шестри Служебнїци Провицниї св. Осифа предводзела мати ґенерална шестрох Тереза Слота з Риму, зоз своїма сотруднїцами, на чолє з провинцийну настоятельку ш. Мартину Кмита. Присутни були и провинцийни шестри зоз Словацкей, України, тиж провинцийни шестрох Василиянкох з Горватскей и України.
На Служби бул амбасадор України у Сербиї Олександер Александрович зоз супругу, представителє Националного совиту Руснацох и велї госци и вирни – домашнї и з других парохийох. Шпиванє предводзели домашнї Мишани хор Дому култури и Катедралней церкви св. оца Миколая, под руководством Лидиї Пашо, як и домашнї дзияк Янко Виславски.
Владикох и ґенералну шестру привитали виронаучни дзеци и подаровали им квеце, а домашнї владика Георгий у казанї повинчовал шестром значни ювилеї и пожадал им же би свою мисию служеня Богу и народу предлужели з Божим благословом.
Ювилеї шестром повинчовал и нунций монс. Сурияни, а ювилантки ш. Вероники Ани Гралюк з нагоди 60-рочнїци єй монашского живота придал и окремни благослов од папи Франциска.
На концу Служби ґенерална шестра Тереза Слота у подзековним слове здогадла на початки шестрох Служебнїцох у України, а тиж и у тих крайох, та на перши Рамачово шестри з Керестура котри вибрали монашски живот у тей заєднїци. Вона тиж подзековала и шицким владиком котри за вецей як сто роки потримовали шестри на тих просторох, а своїм шестром пожадала же би и надалєй щиро шведочели любов ґу Богу и ближньому и служели им и свойому народу.