На Дню славянскей писменосци грамота керестурскей Школи

автор маф
898 Опатрене

ТИТЕЛ – На 16. Дню славянскей писменосци и култури у Тителу, 24. мая, на дзень св. Кирила и Методия, отримана шветочносц на хторей уручени награди за найлєпши состави написани на мацеринским язику. Медзи наградзенима и школяре з наших руских школох.

Основна школа (ОШ) „Петро Кузмяк” з Руского Керестура и єдна з дзешец школох хтори достали окремну Грамоту за длугорочне участвованє на тей манифестациї, а того року участвовали писмени состави школярох на мацеринских язикох зоз 51 школи.

Зоз руского язика змагали ше писмени состави школярох зоз керестурскей Школи и зоз ОШ „Йован Йованович Змай” зоз Дюрдьова, док з коцурскей школи того року нє було роботи. Робота Дорис Бучко, школярки 3. класи керестурскей Ґимназиї, преглашена за найлєпши состав написани на руским язику.

Медзи школскима писменима задатками з 5. и 6. класи перше место завжала Ребека Семан, зоз ОШ „Петро Кузмяк”, при наставнїци Ксениї Шовш, друге место Марина Барна зоз ОШ „Йован Йованович Змай” при наставнїци Мариї Самарджич, а треце Павле Гербут, з керестурскей школи при наставнїци Ксениї Шовш.

У старшим возросту, школярох 7. и 8. класи, ровноправно найлєпши були состави Михайла Рацпетия з керестурскей школи при наставнїци Каролини Папуґа и Єлени Мудри з дюрдьовскей Школи при наставнїци Самарджичовей. Друге место завжал Алексей Мудри з керестурскей, а треце Ясмина Будински з дюрдьовскей школи при спомнутих наставнїцох.

Од роботох штредньошколцох, дзе на руским язику роби лєм Школа „Петро Кузмяк”, наградзени роботи Терези Будински, Марини Надь и Жарка Остоїча при професорки Люпки Малацко.

У жирию котри оценьовал школярски роботи як консултант за руски язик була Мелания Римар.

З тей нагоди у Народней библиотеки „Стоян Трумич” у Тителу хтори орґанизує тоту манифестацию пририхтана мала шветочносц и славски обичай, а награди уручовал писатель зоз Беоґраду Бранко Стеванович.

ПОВЯЗАНИ ТЕКСТИ