ЧЕРВИНКА – У Червинки нєшка, 10. юния, будзе 25. Зонска смотра жридловей фолклорней творчосци, на хторей того року участвую танєчни и шпивацки ґрупи, соло-шпиваче и инструменталисти на жридлових инструментох лєм з кулскей општини, гоч то змаганє аматерох з општинох Србобран, Вербас, Мали Идьош, Бачка Тополя, Жабель, Бач, Бечей и Кула, алє ше нїхто з тих општинох нє приявел за змаганє.
Так на Зонскей смотри наступя шицки точки хтори виведзени на кулскей Општинскей смотри, а з приказами народних звичайох, шпиванками и музичнима точками участвую аматере КУД „Дурмитор”, КУД ґусларох „Марко Милянов”, КУД „Иван Сенюк”, КУД „Сербия”, МКЦ „Непкер” и КУД „Др Гавриїл Костельник” з Кули; Дом култури Руски Керестур, КУД „Кошут Лайош” з Крущичу, Дом култури Сивец, Фолклорна секция ОШ „Вук Караджич” з Червинки и КУД „Йожеф Атила” з Червинки.
Женска шпивацка ґрупа и Хлопска шпивацка ґрупа кулского руского КУД „Др Гавриїл Костельник” на Зонскей смотри участвую з по єдну нашу народну шпиванку, под фаховим руководительством Еуфемиї Поланкош, а Дом култури Руски Керестур зоз Дзивоцку шпивацку ґрупу и Хлопску шпивацку ґрупу, котри одшпиваю по два руски народни шпиванки и з Народним оркестром, котри одграє хоровод „Швитанє”.
Уметнїцки руководитель Керестурцох Мирко Преґун, а Зонска смотра будзе у Доме култури на 17 годзин.