РУСКИ КЕРЕСТУР – У Велькей сали Дому култури нєшка на Мемориялу госцовала дзецинска представа КПД „Дюра Киш” зоз Шиду „Нєлапшни Алибаба и збойнїки”, котру по тексту Тоде Николетича режирал Цветин Аничич.
Патраче були одушевени зоз представу, понеже була барз динамична, провадзена зоз часту змену сценох. Дїло почина кед дванацчлена ґрупа дзецох одлучела бавиц ше по змисту познатей сказки „Алибаба и 40 збойнїки”, а по конєц ришели шицки нєпорозуменя и бриґи зоз сказки, та и сами представели поуку же – док ше двойо вадза, треци хасен збера.
У представи ґлумели дзеци возросту од першей класи основней по трецу класу штреднєй школи. Алибабу ґлумел Давид Гирйоватий, Носати бул Милан Гарвильчак, у улоги Буздованя бул Митар Боцко, а Главатого представел Никола Гнатко. Шаблю ґлумела Ема Штефанчик, а Алимаму Сашка Ящур. Три зарабровани принцези ґлумели – Нару Николина Горняк, Уна Шеремет Теу, а Ену Срна Аничич. Збойнїк бул Александар Девич, принц Нар Дарко Бучко, а Аладина зоз чаривней лампи ґлумел Йован Радакович.
Представу провадзели и дзеци зоз шицких местох дзе ше виучує руски язик у порядней настави и як виборни предмет, школяре од першей по штварту класу основней школи и дзеци зоз пририхтуюцого оддзелєня предшколскей програми у Руским Керестуре.
Ґлумецкей екипи коло руского язика и реализациї того дїла помогли Далибор Болдиш, Наташа Еделински Миколка, о. Владимира Еделински Миколка, и просвитни роботнїки Златица Сивч Здравич и Вера Дупало.
Вецей фотоґрафиї мож поопатрац у нашей фотоґалериї.
