РУСКИ КЕРЕСТУР – На Месней смотри рецитаторох Руского Керестура, отриманей вчера, 1. марца у керестурским Доме култури, змагали ше 28-еро рецитаторе у трох возростох – 16 у младшим, 10 у штреднїм и двойо у старшим возросту.
Першу награду у младшим возросту достал Иван Планчак, котри рецитовал писню „Дїдо Мраз” Михайла Симуновича, другу Марко Ковачевич з писню „Учитель” Меланиї Римар, а трецу награду достала Ема Живкович з писню „О панови Тралалинскому” автора Тувима.
Першонаградзена у штреднїм возросту Валентина Новта, котра рецитовала виривки з писнї „Бависко з дзецком” Блаежея Конеского, другу награду достал Матей Шепински з виривками з писнї Гавриїла Костельника „Два животи”, док трецу награду освоєл Никола Марянович, котри рецитовал писню „Добра и зла слава” Гавриїла Костельника.
Павлина Шепински завжала перше место у старшим возросту, з писню „Зоз кантерберийских приповедкох” Джефрия Чосера, а другу награду достал Мирослав Малацко, котри гуторел виривки з писнї Мирослава Антича „Писма панї Винети”.
Рецитаторох оценьовала селекторка на шицких месних смотрох у кулскей општини Слободанка Настасич з Кули, консултант за руски язик бул Михайло Зазуляк, а котри з наградзених буду участвовац на Општинскей смотри 10. марца, будзе познате по законченю шицких месних смотрох рецитаторох.
Рецитаторох за Месну смотру пририхтали Оленка Живкович, Наталия Зазуляк и Мая Зазуляк, а орґанизовали ю керестурски Дом култури и Културно-просвитна заєднїца Општини Кула.
Як узвичаєне, на початку Смотри як госци наступели дзеци з Предшколскей установи „Бамби” з Кули, Оддзелєня „Цицибан” у Керестуре, а того року рецитовали Валентина Гарди и Андрей Пашо, котрих порихтали воспитачки Емилия Костич и Блаженка Мецек.
Тиж так, госци на програми були и дзешецеро музичаре – школяре Школи за основне музичне образованє Кула, Оддзелєня у Керестуре, а конферансу водзела Сара Планчак.