На Сайме представени и кнїжки по руски

автор апал, фото вев
923 Опатрене

БЕОҐРАД – На 62. Медзинародним беоґрадским сайме кнїжкох, вчера, 26. октобра, НВУ „Руске слово”, як и Завод за културу войводянских Руснацох, представели свойо виданя.

Присутних на промоциї привитала директорка НВУ „Руске слово” Мартица Тамаш, хтора надпомла же найновши кнїжки наша скромна учасц у обсяжней акциї приблїжованя писаного слова, кнїжкох, хтору розпочали компетентни министерства и институциї, ґу публики, а окреме ґу школяром и студентом. 

З тим цильом, зоз богатого фонду кнїжкох видавательного оддзелєня, як надпомла директорка, нашим институцийом, библиотеком и школом по конєц рока буду подаровани пакети кнїжкох зоз продукциї НВУ„Руске слово”.

На Сайме представени кнїжки студийох и есейох др Юлияна Тамаша „Складанє идентитетох”, кнїжка поезиї Сашу Сабадоша „Дармоєди”, младежски роман Себастияна Нярадия „Инсур – рика княза” (шицки три з тогорочней продукциї), литературних критикох „Шитко” Олени Планчак Сакач, штварти том позбераних творох Гавриїла Костельника „Роса и слунко”, кнїжка Миколи Мушинки „Од усней по писану литературу” и сликовнїца Михала Ковача „Челядз дринкова”. О тих литературних творох бешедовали авторе и рецензенти.

Завод за културу войводянских Руснацох вчера тиж представел свойо виданя – „ Моноґрафию Бикич Долу” и мастер роботу Ани Римаровей „Уплїв українских писательох на Михайла Ковача”.

ПОВЯЗАНИ ТЕКСТИ