КУЛА – На вчерайшим Сайме за обезпечованє роботи, котри отримани у просторийох мадярского културного цантра „Непкер” у Кули, було понукнуте вецей як 150 роботни места. Саям орґанизовала кулска филияла Националней служби за обезпечованє роботи (НСЗ), а роботу понукали 25 роботодавателє.
На отвераню Сайма бул предсидатель Скупштини општини Кула Велибор Милойчич и директор филияли НСЗ зоз Зомбора Секула Танєвич, понеже то филияла котра компетентна за општини Зомбор, Апатин, Кулу и Оджак.
На Сайме медзи нєзанятима найвекше интересованє було праве за будуци кулски фабрики котри и глєдали найвецей роботнїкох, як цо то „Фиорано” и „Еуроин”. За Керестурцох значна и оджацка „Маґна ситинґ” котра обезпечує превоз зоз валалу. Зоз Керестура роботу понукали подприємства „Юарбис” и „Изґлед”.
Найпотребнєйши роботнїки зоз закончену штредню школу, векшина роботодавательох нє вимагала окремне искуство. Зоз векшим проблемом на таких збуваньох ше зочую високообразовани нєзаняти особи, понеже ше таки роботни места менєй отвера.
Идуци Саям обезпечованя роботи будзе 20. априла у Зомборе.