ЗЛАТИБОР/РУСКИ КЕРЕСТУР – Стретнуце орґанизаторох манифестацийох, єденасте по шоре, отримане на Златибору 2. и 3. марца, а на нїм присуствовали предсидатель Вивершного одбору Националного совиту Руснацох Желько Ковач, предсидателька Здруженя продуковательох паприґи „Капсикум анум” Душица Орос и заменїца предсидательки Здруженя женох „Байка” Наталия Емейди.
На стретнуцу присуствовали представнїки Влади Сербиї, АП Войводини задлужени за туризем, представнїки туристичниих орґанизацийох зоз цалей держави, з БиГ, числени готелиєре и погосцителє.
На тему „Стратеґия розвою туризму и манифестацийох националних меншинох” викладал помоцнїк за туризем и реґионалне-привредне сотруднїцтво при Покраїнскому секретарови за привреду и туризем Серґей Тамаш. На тоту тему зоз своїм викладаньом о Фестивалу „Червена ружа” предлужел Желько Ковач.
Душица Орос презентовала потенцияли и розвой туристично-привредно-културней манифестациї „Днї керестурскей паприґи”, як и орґанизацию тогорочней манифестациї з помоцу средствох з Европскей униї. Викладанє Оросовей було препознате як интересантне, прето же ше сама манифестация отримує з цильом промованя автохтоного продукту керестурскей роговей паприґи.
