РУСКИ КЕРЕСТУР – Внєдзелю, 21. октобра, з нагоди Дня ошлєбодзеня Руского Керестура у Другей шветовей войни, домашнє Здруженє спортских рибарох (ЗСР) „Коляк” орґанизовало традицийне змаганє у лапаню риби – „Чукияду”.
На тогорочним змаганю, и попри жимней хвилї и барз витровитим предполадньом, змагали ше аж трицецеро сениоре и двоме пионире. Медзи учашнїками векшина була члени ЗСР „Коляк” з валалу, алє було и госцох з других местох.
У катеґориї пионирох перше место освоєл Борис Жирош котри влапел чуку чежини 295 ґрами, попри нього змагал ше и прешлорочни побиднїк Стефан Варґа котри нє влапел анї єдну чуку, а з оглядом же у тей катеґориї нє було других змагательох, обидвоме наградзени зоз циґонями.
У конкуренциї сениорох перше место завжал Янко Фекете з влапену чуку чежини 1646 ґрами, друге место Желько Маґоч з двома чуками, чежини 1505 ґрами, док треце место освоєл Янко Планчак, чий улов була чука чежка 1395 ґрами.
За шицких учашнїкох и своїх членох ЗСР „Коляк” по законченю штирогодзинового змаганя орґанизовал полудзенок и друженє, а сениоре достали пенєжни награди – за перше место 6 000 динари, друге 4 000, а за треце 2 000 динари
Змаганє отримане на часци беґелю поза брану, ґу крущицкому мосту, а вкупно влапени лєм осемнац чуки.