ПЕТРОВЦИ – Централни програми 44. Културней манифестациї Руснацох у Републики Горватскей (РГ) „Петровски дзвон” отримани внєдзелю, 4. юния, а на танєчно-музичней програми дзецинскей творчосци „Петровски дзвончок” того року участвовали подростки руских културно-уметнїцких дружтвох з Вуковару, Миклошевцох и Петровцох, як и школяре з ОШ „Антун Бауер” з Вуковару, єй Подручней школи у Петровцох.
На пополадньовей програми з назву як и цала Манифестация „Петровски дзвон”, представени танєчна, музична и шпивацка творчосц Руснацох у Горватскей, а наступели фолклорна и шпивацка секция КУД „Яким Гарди” з Петровци, члени КУД Русинох Осиєку, Дружтва Русинох и Українцох Калїна” з Риєки, КУД „Осиф Костелник” з Вуковару, КД Руснацох з Винковцох, КУД „Яким Ґовля” з Миклошевцох, Дружтва Руснацох у РГ „Руснак”, КД Руснацох „Цвелферия” з Райового Села, шпивацки дует Михал Голик и Аня Ґрищук з Петровцох. Госци на програми були члени КУД „Томислав” з Церни, котри танцовали славонски танци.
Учашнїкох, публику и госцох на „Петровским дзвонє” привитала предсидателька Союзу Русинох РГ Дубравка Рашлянин, а Манифестацию отворел началнїк Општини Боґдановци Марко Барун. На програми внєдзелю присуствовал и предсидатель Вивершного одбору Националного совиту Руснацох Сербиї Желько Ковач.
Манифестация отримана под високим покровительством Совиту за национални меншини РГ, а у орґанизациї Союзу Русинох РГ и КУД „Яким Гарди” з Петровцох. Того року на „Петровским дзвонє означени 90-рочнїца народзеня учительки Вири Гудаковей, 240-рочнїци снованя Крижевского владичества и 40-рочнїци шмерци др Федора Лабоша.
Централни музично-танєчни програми „Петровского дзвону” отримани на дзень другого кругу локалних виберанкох у Горватскей, та и обсяг програми, госцох и публики бул менши як други роки.