ШАБАЦ/РУСКИ КЕРЕСТУР – Прешлого тижня у Шабцу отримане поєдинєчне державне першенство за столнотенисерох у катеґориї младших кадетох и кадеткинї, на котрим учасц вжали спортисти Столнотенисерского клубу „Русин” зоз Руского Керестура.
Медзи 60 учашнїками зоз цалей держави, з Керестура ше змагали Матей Сабадош, Сашо Шанта, Иґор Фейди и Матей Макаї. На тот завод ше им нє удало освоїц медалї, понеже на першенству преважно участвовали дзеци пиятей и шестей класи основних школох. Керестурски спортисти младши, алє бавели з вельо ентузиязму.
Орґанизатор першенства бул Столнотенисерски клуб „Лєв” зоз Євремовцу, а змаганя отримани у Спортскей гали Штреднєй економско-тарґовецкей школи у Шабцу. Керестурцох за тото змаганє пририхтал тренер Драґан Ковачевич, одход финансовал Столнотенисерски клуб „Русин”, а котизацию плацели сами бавяче.