НОВИ САД – Штварток, 8. юния, на Штранду у Новим Садзе почали два фестивали – перши Штранд Summer Fest и Седми Медзинародни фестивал фолклору и музики „Доволованє ровнїни”. Перши ше отрумує на просторе под Мостом шлєбоди, а други на централней площи Штранду.
Штранд Summer Fest тирва три мешаци и буду орґанизовани рижни програми, роботнї, маскенбали, спортски змаганя и други активносци, а буду наступац и популарни ґрупи и ди-джейове. На соботу, 17. юния, на тим фестивалє наступаю „Фрайли”.
На Седмим Медзинародни фестивалє фолклору и музики „Доволованє ровнїни”, хтори тирва по нєдзелю, 11. юний, участвую вецей як 2 000 танєчнїки и музичаре зоз Сербиї, Републики Сербскей и Горватскей, а Фестивал орґанизує Здруженє „Вельке коло” з Ветернику, з потримовку Городу, його явних подприємствох и туристичних орґанизацийох Нового Саду у Войводини.
Вчера, 8. юния, на тим фестивалє фолклору з двома танцами дзецинскей и пририхтуюцей танєчней ґрупи и єдну музичну точку участвовали и члени КУД „Тарас Шевченко” з Дюрдьова.
Попри фолклорних и музичних ґрупох, хтори свойо точки виводза од пополадню (коло 17 годзин) до 23 годзин, будзе и предаванє меду, колачох, ручних роботох, вина и других продуктох.
