НОВИ САД – На ютре, 16. децембра, буду орґанизовани роботнї за младших и старших, на котрих заинтересовани годни научиц як треба написац проєкти и пополнїц потребни формулари за реализацию рижних идейох и програмох.
Перши сет роботньох пошвецени младим активистом, односно особом хтори водза младежски проєкти лєбо секциї у одредзеним дружтве, здруженю, орґанизациї и хтори маю идею и жадаю ю реализовац у своєй заєднїци. Попри роботнї на хторей годни розвиц свою идею до проєктного предкладу до тей мири же го зоз малима дополнєнями годни послац на шлїдуюци конкурсни розпис финансиєрох, млади годни винєсц и свойо идеї о напряме у хторим би Завод за културу войводянских Руснацох могол реализовац свойо проєкти идуцого року кед будзе означена Европска престолнїца младих у Новим Садзе.
Други сет роботньох пошвецени гевтим активистом лєбо занятим у одредзеним дружтве, здруженю, орґанизациї хтори уж писали проєктни предклади на конкурси Заводу за културу ВР и НС Руснацох. На роботньох будзе слова о тим як пополнїц формулари, як их прилагодзиц/злєпшац и як написац финансийни и наративни звити за реализовани проєкти.