РУСКИ КЕРЕСТУР – Тогорочни 12. по шоре Медзинародни волонтерски камп у Руским Керестуре будзе отримани у периодзе од 23. юлия по 4. авґуст, орґанизую го Туристичне здруженє „Руски Керестур” и Млади виглєдоваче Сербиї, а лидер Деян Будински.
Циль и тогорочного кампу же би ше злєпшало туристичне понуканє валалу, а роботнї буду орґанизовани до штирох часцох – правенє терну за одбойку на писку на базену, фарбенє огради коло церкви, фарбенє огради коло будинку Замoк и роботи у найстаршей рускей хижи.
Камп ше орґанизує пре роботнї, алє у кампу млади маю нагоду розвивац мултиклутуралне друженє, так же домашнї волонтере буду представяц свою културу и историю, а буду мац нагоду дружиц ше з волонтерами зоз цалого швета – з Русиї, Турскей, Мексика, Ирскей и других державох.
Волонтере буду мац нагоду участвовац и у роботнї котру будзе орґанизовац Здруженє женох „Байка” дзе буду правиц капущанїки, пироги и домашнї резанки.
Остатнї дзень кампу будзе орґанизовани турнир у одбойки на писку з котрим будзе отворени новонаправени терен и заварти тогорочни камп, а шицко зоз преславу успишно поробеней роботи. Участвовац на турниру годни шицки заинтересовани екипи.
Шицки млади котри заинтересовани за волонтиранє и друженє у тогорочним кампу треба же би ше явели лидерови кампу Деянови Будинскийови, лєбо предсидательки Туристичного друженя Любици Няради, або на официйни фейсбук бок кампу Медзинародни Волонтерски Камп.
Камп потримали велї орґанизациї, здруженя и приватни поднїмателє, алє кажде хто жада помогнуц, на гоч яки способ, зоз спонзорством, то може зробиц и под час кампу.