РУСКИ КЕРЕСТУР – На соботу 10. фебруара у Новим Садзе будзе отримани дзеветнасти по шоре Науково-фахови сход „Сучасна продукция желєняви” у Мастер центру Новосадского сайму. Орґанизаторе совитованя Войводянске дружтво заградкарох (ВДЗ), Одбор за валал Сербскей академиї наукох и уметносцох (САНУ) и Конґресни Мастер центер Новосадского сайму.
Фахове совитованє за аґрономох, фахову и наукову явносц иницировали продукователє желєняви. На сходу буду розпатрани числени проблеми у продукциї желєняви, алє и приклади добрей пракси.
Уход на науково-фахови сход шлєбодни и можу присуствовац шицки заинтересовани, а поволани заградкаре, здруженя заградкарох, представителє задруґох, домашнїх и иножемних компанийох чийо продукцийни програми вязани за продукцию желєняви на отвореним и у завартим просторе, представителє медийох и велї фаховци з тей обласци. Сход будзе у Велькей сали и голу Мастер центра, а почнє од 9 годзин.
Циль отримованя такого сходу же би ше унапредзела заградкарска продукция з правилним вибором найпродуктивнєйших сортох и гибридох желєняви, а же би ше з адекватним благочасовим залїваньом и запровадзованьом мирох защити зачувало заградкарски култури од хоротох, чкодлївцох и коровча.
Спред орґанизатора викладац будзе проф. др Жарко Илин, предсидатель ВДЗ, а будзе присуствовац и академик Драґан Шкорич, предсидатель Одбору за валал САНУ. Попри тим викладац буду и числени фаховци з тей обласци.
Здруженє паприґарох „Капсикум анум” за своїх членох орґанизує одход на тот сход, а приявиц ше мож при предсидательки Здруженя Душици Орос.