ДЮРДЬОВ – Тогорочни, шеснасти Фестивал жридлового шпиваня „Най ше нє забудзе” традицийно будзе отримани на соботу, 18. авґуста на 20 годзин у Задружним доме. На Фестивалу наступя по тераз приявени нашо културно-уметнїцки дружтва зоз Вербасу, Нового Саду, Петровцох, Коцура, Миклошевцох, Кули, Бикичу, Руского Керестура, Нового Орахова, а наступя и домашнї.
Пропозициї за облєчиво и шпиванє остали исти – жени, дзивки и хлопи маю буц облєчени до руского народного шветочного облєчива, жени вивязани до фитюли або баршоня, а хлопи з калапом на глави. Наступ и далєй огранїчени на седем минути за два шпиванки по ґрупи, єдна акапела и єдна у провадзеню оркестра.
На Фестивалу будзе и ревиялна часц у котрей наступи Шпивацка ґрупа „Дюрдєвак” зоз Дюрдьова. Пред тим, на 16 годзин, опрез будинка домашнього КУД „тарас шевченко”, будзе вистава Стари ремесла, а на 17 годзин у Рускей школи будзе виложена часц постановки з Каталоґа „Руска одлога” котра потераз нє викладана.