КОЦУР – На соботу, 23. септембра у „Руским доме“ у Коцуре будзе друженє з назву „Зашпивайме вєдно“, на хторим ше шицки котри приду, попри друженя у приємней атмофери, упознаю и з руску музику. „Зашпивайме вєдно“ почина на 20 годзин.
Попри слуханя рускей музики и шпиваня, присутни годни видзиц як випатра перша руска ґрамофонска плоча, компакт-диски з руску музику, як и други ствари вязани за нашу шпиванку.
Пред тим, исти вечар на 18 годзин почнє уписованє нових членох до секцийох КУД „Жатва“, та руководительство КУД поволує родичох же би приведли дзеци понад 3 роки и предшколски дзеци же би ше упознали зоз секциями „Жатви”.
На упис поволани и школяре, младеж и шицки други заинтересовани котри жадаю буц члени фолклорней, шпивацкей, драмско-бабкаркей, ритмичней, литературней, еколоґийней, дебатней, шаховскей, лєбо историйней секциї КУД „Жатва”.