РУСКИ КЕРЕСТУР – На керестурским теметове на соботу, 20. октобра од 9 годзин, будзе орґанизована єшеньска акция розкерчованя старей часци теметова на коло 4 арох. Поволани помогнуц цо вецей жителє Керестура.
Тото порадзене на вчера отриманей схадзки у Месней заєднїци, хтору иницировали активисти Месного осбору Сербскей напредней странки (СНС). Як за Рутенпрес виявел предсидатель МО Иґор Фейди, на схадзки були и представителє Церковного одбору катедралней церкви св. оца Миколая, Добродзечного огньогасного дружтва, ФК „Русин”, а по його словох, до акциї ше придружа и члени Конїцкого клубу „Русин” и Рибарского здруженя „Коляк”.
На схадзки бул и предсидатель Општинского одбору СНС и директор кулского Комуналного подприємства Марко Пешич, хторе тиж помогнє у тей акциї.