СЕРБИЯ – На ютре, 2. априла, у Сербиї буду виберанки за предсидателя держави, а за функцию предсидателя Републики Сербиї змагаю ше 11 кандидати, котрих предложели политични странки и коалициї, лєбо ґрупи гражданох.
Гласацке право на предсидательних виберанкох маю 6 милиони 724 949 гражданє Републики Сербиї, а годни гласац на 8 253 виберацких местох, хтори ютре буду отворени од 7 до 20 годзин. Гласа ше зоз заокружованьом єдного шорного числа опрез мена кандидата на збирним виберацким лїстку.
Попри з важацу особну леґитимацию, вибераче можу гласац и з пасошом, лєбо вожацку дозволу – з документами на хторих єст єдинствене матичне число граждана. Ткв. „стара” особна леґитимация, хторей вицекол час, на гласаню важи лєм вєдно з потвердзеньом з МУП-у же порушани поступок за єй предлуженє.
На гласанє добре вжац и обвисценє о виберацким месце хторе гражданє достали на хижну адресу, насампредз пре швидше евидентованє гласача, алє є нє обовязне.
Вибераче котри пре здравствени причини нє можу пойсц на виберацке место, як и особи з инвалидитетом и стари нємоцни особи, гласац можу и дома, алє о тим на ютре до 11 годзин муша обвисциц виберацки одбор на своїм виберацким месце.
Предвиберанкова цихосц пред виберанками за предсидателя Сербиї почала штварток, 30. марца на пол ноци, а тирва по заверанє гласацких местох.
Як сообщене з Републичней виберанковей комисиї, перши резултати гласня би мали буц познати 24 годзини по завераню виберацких местох.